Kruši voi gauši
![](https://lpr.gov.lv/wp-content/uploads/2005/dezuratteli/287.jpg)
Kruši voi gauši. Nuj, nuj. A iz prīšku juoteik. Nasaverūt ņi iz kuo; voi tev puori ceļam puorskrīņ malnīs kačs, voi tevi kaids aiztur pi krutkys butilis, voi asi navasals, voi – sapeits politiskajūs pynāklūs …
A cik tūs kaveituoju sasarads! Taišni moti pakausī ceļuos stuovus. Vys, naļaun i naļaun tikt iz prīšku.
Vīnīm – pamoz apraksteitu papeiru, ūtrīm – volūda napareiza, trešajīm – politiskuo orientaceja klibnej, catūrtajīm – čekys maisi kai barikadis prīškā, pīktajīm – nasovā loktā izliecs dzīdi …
Tādiņ pat. Seikī i nabadzeigī Latgolys zemnīceni ( da, vysā Latvejā jūs gona) pa puora godu atsakūpušs ar Esa tīšmoksuojumīm, beja saplanavovušs sovys siejumu plateibys palylynuot, palylynuot produktivūs lūpeņu skaitu, palylynuot biologiskuos saimenīkuošonys plateibys, kai soka – īt iz izaviersšonūs ražuošonā. A te – sveiki pakšs! Eiropys Komiseja tīšmoksuojumus pavieļ atdaleit nu ražuošonys … Ņi kruši, ņi gauši – vairuok iz prīšku natiksi.
Voi otkon. Laucinīki, saprazdami sovu miseju tautys atražuošonā, ar vysīm spākīm pīsaturieja pi saimis tykuma; lai dzymtu pulka bārnu, lai kotram bārnam veiduotūs sova, ar bārnīm ražeiga, saimeite. Te – kai ar eiksi acī! Teik izstruoduoti lykumakti par vīndzymuma lauleibu propogandu jov nu bārnuduorza vacuma. Ņi kruši, ņi gauši, a dzymtys kusteiba apsastuosīs, jo bārnus to nakākoj a roda.
I kū par itū lai soka? Zemnīks sovu bārnu pi dorba radynoj jov nu pīcu godu vacuma. Kai soka – maine juoizaudzej ar nabaismi nu dorba. A školuos ir pavysam cyta – kundzeņbārnu politika, kur pat tāfelē pošam ar kreitu saraksteituo nadreikst nūslauceit. Asūt bārna tīseibu i breiveibys aizskuorums. Tai – ņi kruši, ņi gauši, a pi struodeigys tautys nūmainis nadatikt. Nogu maucieji viņ izaugs…
A kur vieļ trokuok! Kyupynova Latvejā reņgeitis. Iedem vysi, Dīvu teikdami. Nyvle – myusu gordūms naatbylstūt ņi rītumu, ņi austrumu standartīm. Cepem eistu myltu gordumgordū maizeiti, kura pat sabrīdusi beja ādama ar gordu muti. Nu, standarti i regulys pīprosa īškā biert vysaidus e- pīmaisiejumus i kruosys šmukumam. Par seitumu i veseleigumu ņivīns narunoj. Kas tei vaira par maizi! Daže plievē īteita, jov ūtrajā dīnā ir kai sukuļa kolači. Ņi kruši, ņi gauši, a, iz vītys stuovam sovā tautys gudreibys nūsmuodeišonā, kai taidi komauši …
Ruodīs – krušuok voi gaušuok, a itaidā veidā – mes na iz prīšku īsim, a krissim i krissim sovu pat syudu dūbē īškā, nu kurys, myusus izviļkt uorā, nabyus kam rūkys padūd.
Ceceļānu Ontiks
Roksts publicāts Sadarbeibā ar Republika.lv