Jauna tauta?

Jauna tauta?

Latgolys rajonu i mīstu gazetys puorsaveru bibliotekā ar atsprieklenīmūšu datumu gona regulari. I dūmoju, ka Latvejā var runuot par divejom informativom ryumem na tik viņ rakursā (latg. īlykumā) latvyskuo i krīvvolūdeiguo prese, bet gon ari – vysys vaļsts i lokaluo.
Pādejā var atrast tū, kū beistuos ci kautrejuos iznest iz vysu vaļsti, bet par kū meilipruot ir gotovi parunuot tepat aiz pakseiša. Kai kuozu ūtruos dīnys piecpušdīnē, kod vysi oficialuokī gosti ir jau paceli, i tān var sēdēt ar izlaistu kraklu, ēst ar lizeiku nu kūpeiguos rosola bļūdys i runuot tū, kas iz mēlis gola karinej.
Ot, pādejū godu laikā Latgolys pusis presē asmu īraudzejs, ka ir pīdzymuse jauna tauta, i nivīns tai eisti tū vēļ navā pamaniejs. Ka cytur roksta, ka Latgola izmierst, vēļ cytur, ka kotru godu pasaulī izgaist pa 7–10 tautom i gondreiž symts mutvuordu volūdom, bet Latgolā tymā laikā ir nūtics unikums – pasaruodejuse jauna tauta.
Nu, tod ot jau kurū eili Latgolā izīmūšajā latvyskajā presē kaidā intervejā varu skaiteit, ka cylvāks par sevi soka: „Es esmu latgaļecs”. Nu konteksta gon var saprast, ka itais latgaļecs ir tys pats krīvs, boltkrīvs, ukraiņs voi kaidai cytai vysim zynomai tautai pīdereigs.
Labi, ni es, ni vēļ kaids cyts navar aizlīgt kaidam cylvākam saukt sevi par tū, par kū jis gryb. Gazetā gon, bet dīzyn voi pasē maņ īraksteis, ka es gribu byut hobits ci asmu nu Atlantidys. Muļķu parteji var pīregistrēt, bet tauteibu sfērā taida liberalisma navā.
Kai soka, koč mozeņai, bet kuorteibai irā juobyun.
Voi nu tu pījem gotovus nūteikumus, voi nu pasē, kai tān Latvejā tys atļauts, vyspuor nikuo šamā sadaļā naroksti.
Vīneiguo vaļsts, kurā niule oficiali dzeivoj latgaļci, ir Krīvejis Federaceja. Tī pādejā tautys skaiteišonā vairuoki symti cylvāku sevi par taidim nūsauce, ar taidu apzeimiejumu i pasaruodeja oficialajā statistikā. Tikai jī tī vysi ir iz Krīveju izbraukušū voi izvastū latgalīšu piecteči.
A pi myusim i tān latgaļci ir Latgolā dzeivojūšī cylvāki, kurim saimis volūda ir krīvu, i kuri nazyn par kū nagryb sauktīs tradicionalajūs tautu apzeimiejumūs. Par latvīšim voi latgalīšim sauktīs jīm nabyutu pareizi, par Latvejis voi Latgolys īdzeivuotuojim – nagryb.Voi nu tradicionalajim apzeimiejumim nav prestiža, voi jī ir iz rūbeža i suok sajust sevī cytu identitati, voi te kas vēļ ir – es nazynu. I tys pi tuo, ka jau tai ir naskaidreiba ar taidim nu molys sakonstruietim terminim kai „latgaļs”, „letgaļs”, „latgalīts”.
Paleidzit maņ, naproškai, itū saprast.

Valentins Lukaševičs, “Latvijas Avīze”, 2007.goda septembris