Jākubpilī gastej SM omotpersonys

1.junī Jākubpili apmeklej Satiksmis ministrejis (SM) vaļsts sekretara vītnīks Andulis Židkovs i vaļsts AS “Latvejis Vaļsts celi” vaļdis prīkšsādātuojs Tālis Straume. Jākubpilī gosti apsekova satiksmis objektus i īsapazyna ar investiceju apgivi. Vizitis laikā planavuots puorrunuot byuvnīceibai paradzātuo tylta puor Daugovu vizeju, kai ari apmeklēt VAS “Latvejis Vaļsts celi” Latgolys regiona Jākubpiļs nūdaļu.

Vaļsts prezidente Vaira Vīķe-Freiberga šudiņ turpynoj viziti Latgolā i Vidzemē, šudiņ prezidentei paradzāta vizite Bolvūs, kur jei tiksīs ar pošvaļdeibys vadeituojim.

Šudiņ Daugavpili apmeklej Italejis piļsātys Lečes puorstuovju delegaceja. Tikšonuos laikā tiks prezentāts starptautisks projekts, kurais paredz izveiduot sadarbeibys teiklu jaunīšu veseleibys veicynuošonai, jaunīšu narkomanejis atkareibys problemu rysynuošonai, kai ari īsapazeit ar italīšu pīredzi itūs problemu rysynuošonā i apsamaineit ar idejom. Daugavpili pīsadaleit itymā projektā uzaicynuojus tuos sadarbiebys piļsāta Panaveža, kurai jau ir pīredze leidzeigu projektu eistynuošonā sadarbeibā ar Lečes organizacejom.

Iz vosorys mienešim Rēzeknis slimineicā nu šudiņdīnys pakuopeniski samozynuos pacientu gultys vītu skaitu da 50%, bet Ludzys slimineicā par apmāram 10-15%. Rēzeknis slimineicys golvonais uorsts Jāzeps Korsaks pastuostie, ka juņa suokuos pakuopeniski suoks samozynuot uzjamamū pacientu skaitu Kirurgejis i Neiroligejis nūdaļā, drupeit vāluok ari Terapejis nūdaļā, leidz vysuos nūdaļuos byus puse nu pacientu skaita. Slimineicā paleidzeibu snīgs sliminīkim ar ūmeigom (akūtom) naveseleibom, bet planveida uorstiešonu vosorys mienešūs naizdareis.
Ludzys slimineicā asūšū 140 gultys vītu skaitu junī samozynuos par 17 vītom, julī par 20, bet augustā par 13 gultys vītom. Vosorā iz pusi samozynus gultys vītu skaitu Infekceju nūdaļā, bet julī iz mienesi slēgs Bārnu nūdaļu, pamatūt dažys gultys vītys mozeņkajim pacientim Infekcejis nūdaļā.

Šudiņ Latgolys apgoboltīsys kriminallītā par Bolvu uzjiemieja Alberta Brīža slepkaveibu i cytom lītā saisteitajom epizodem turpynuos apsyudzātūs nūpratynuošonu. Krīvejis Federacejis pilsūni Konstantinu Sisujevu apsyudz par A.Brīža slepkaveibu sevišķi pastyprynūšūs apstuokļūs, beidzamajā tīsys sēdē apsyudzātais Sisujevs atzins sovu vaini.

Nu šudiņdīnys Rēzeknē atkrytumu apsaimnīkuošonys uzjāmumā speciali itam snāgam (nūlyukam) paradzāta lela izmāra konteinerā varēs bez moksys nūdūt gražeigūs palīkus (beistamūs atkrytumus). Konteiners atsarūn AS “L&T Hoetika” Latgolys filialis teritorejā, Atbreivuošonys alejā 165/1. Gražeigī palīki nū dzeivuotuojim tiks pījimti dorba dīnuos nu 8:00 leidz 16.30.

Nu šudiņdīnys Daugavpilī spākā stuojās centralizātuos iudiņa apguodis i kanalizacejis pakolpuojumu jaunī tarifi. Tagad 52 santimu (bez PVN) vītā byus juomoksoj 70 santimi par kubikmetru (bez PVN), tymā skaitā iudiņa apguodis pakolpuojumi – 37 santimi – i kanalizacejis pakolpuojumim 33 santimi par kubikmetru.

Šudiņ Daugavpilī i Rēzeknē nūtiks Bārnu aizsardzeibys dīnys pasuokumi. Daugavpilī Vīneibys laukumā nūtiks bārnu jaunīšu centra “Jauneiba” reikuotī Lītišķuos muokslys svātki bārnim i jaunīšim “Doba i dvēsele”, vāluok Daugavpils regionaluos slimineicys Dzemdeibu nūdaļā paradzāta jaundzimušūs i jūs mameņu sveikšona. Rēzeknē – koncerts Nacionālūs bīdreibu kulturys nomā i pasuokums Rēzeknis piļsātys kulturys i atpyutys parkā.