Iz Latgolu brauc ministri
![](https://lpr.gov.lv/wp-content/uploads/2005/dezuratteli/79.jpg)
Bet īkšlītu ministrs Ivars Godmanis pats personeigi gryb apsavērt plyudu skortuos vītys Jākubpilī i Aizkrauklē. Paradzams, ka šudiņ ministrs pats īsarass plyudu skortajuos vītuos Jākubpilī.
Ludzys rajona padūmis sēdē pošvaļdeibu vadeituoji davuši pylnvaruojumu Ludzys rajona padūmis prīkšsādātuojam Juram Dombrovskim izdūt reikuojumu par uorkuortys situacejis izsludynuošonu rajonā deļ mašynu garuos ryndys iz Ludzys- Terehovys ceļa. Dombrovskis telefonintervejā Latgolys radejai sacieja, jo mašynu rynda byus vairuok kai 800 mašynys i tys traucēs puorsavītuot zemnīkim ar sovu lauksimnīceibys tehniku, šaidu uorkuortys situaceju varātu izsludynuot.
Daugavpiļs dūmis sēdē pošvaļdeibys deputati vakar sēdes laikā uzsuokuši dorbu ar portativajim datorim. Papeiru kolnu vītā niule dorbu ar lāmumu projektim deputati veiks ar kompjuteru paleidzeibu. Fotografeju, kai deputati ar portativajim datorim sēd pi golda, var apsavērt puorstaipteiklā – www.daugavpils.lv.
Laikā kod Daugavpili apmekliejs veseleibys ministrs Vinets Veldre, Puortikys i veterinarais dīnasts paviestejs, ka Leiksnys pogostā atkluotys divys mašynas ar 1150 nūvuorgušim syvānim, kas vasti nu Dānejis iz Krīveju. Inspektori nūskaidrovuši, ka nav šūs syvānu īvešonys atļauju i dieļ tuo niule par itū gadīni paziņuots Dānejis Veterinarajam dīnastam.
Kruoslovā nūtics pyrmais seminars projekta “Motivacejis programa Latgolys jaunīšu integracejai dorba tiergā” ītvorūs. Projektu realizej Dīnvydlatgolys NVO centrs i tymā īsaisteiti 80 jaunīši nu Daugovpiļs, Kruoslovys i Preiļu rajonim, kas ir bezdarbnīki. Projekta organizatori prognozej, ka piec tuo eistynuošonys 15 jaunīši varātu uzsuokt sovys dorba gaitys.
Jākubpilī suokta diskuseja par augstškolys veiduošonu piļsātā. Regionaluo augstškola varātu kliut par nūpītnu i svareigu īguldiejumu piļsātys atteisteibā i piļsātys tāla veiduošonā, uzskota piļsātys deputati. Augstškolu varātu izveiduot iz Agrobiznesa koledžys bāzes voi varbyut dybynuot nu jauna i ite sagatavuot ekonomikys, informacejas tehnologeju i inženīrzynuotņu specialistus. Vīņ muoceibspāku tryukums varātu kliut par škiersli taidai īcerei.