Iz Buku Mikili sipisnīka āstu …
Tiergu dīnuos i svādīņuos piec miša laika, a tāva Mikiļa sātā kotru svādīņi varieja dabuot drappeitis par naudu, a sova cīma i pazeistomajīm nu apleiciejūs cīmu
puišīm tyka dūts poruodā.
Pi Buku Mikiļa apleicīnis puiši beja pasuokušs pa svādīnis vokorīm kārtys spieleit. A saiminīks, kotru reizi puišus cīniejs ar sipisnīku, kurs bejs salykts ar suoli kūka paskeņuos i cīži patics vysīm. Ot, tai i pakleidušs volūdys – ka puiši īnūt iz Buku Mikili sipisnīka āstu. A piec taidys sipisnīka iesšonys (patīseiguok byutu juosoka – drappeišu dzeršonys i kārtuošonys da duraceibai), puiši atsagrīzušs sātuos pavysam jūceigi. Vīnam licīs, ka pa sīnuom valni ruopoj. Ūtram – ka lūgā rogona sied. A cytam – Diva kokta obraza vītā pakuorts sābra sirdeigais gaiļs. I tai – na vīnu viņ reizi puiši beja satrokovušs taidys nalobys delys, ka tāvi i muotis nasuoka vairuok dālus pi Buku Mikiļa laist kārtuotu, a daspīde svādīnis vokorūs veizis peit.
Voi myusu dīnuos nazkys taids nasaīt ar myusu vaļsts omotu veirīm i sīvuom, ar myusu Saeimys deputatīm?
Brauc i brauc jī tai pacieški to pi Putina, to pi Buša, to iz Briseli, to – a kū žo tī vysus saukt … Vīnā vuordā – kai iz Buku Mikili sipisnīka āstu. I atsagrīzušs, na dora pasuoktūs dorbus, a, kai cīma puiši piec drappeišu dzeršonys, suoc izjaukt, demoleit, napruoteigi reikuotīs ar sovu „sātu” – myusu vaļsti i myusu tautys dzeivisveidu.
Vai nabyutu tautai juoizdora tai poš kai seņuok izdarieja tāvi i muotis ar sovīm dālīm? Ka jov tei „sipisnīka iesšona” gastejūtīs pi cytvaļstu „Buku Mikiļa” ir tik pruotu apstulbynūša, to – dūsim pokulu auklys, līpu lyukus, bārzu tuoss, lai pyn veizis i tierguojuos Breivdobys muzejā, a na myusu „sātu” apškodej!
Ceceļānu Ontiks
Roksts publicāts sadarbeibā ar Republika.lv