Informies par Riezeknis iudeņssaiminīceibas projekta realizacejas gaitu

Trešdiņ 10.oktobrī desmitūs nu reita SIA “Rēzeknes ūdens” administrativajā kuormā nūtiks informativuo saīšona, kuramā masu medijus īpazeistinuos ar “Rēzeknes ūdenssaimniecības projekta” realizacejas gaitu.Eipaša izmaneiba tiks davārsta dzaramuo iudeņs sagatovūšonas i atdzelžūšonas kompleksam, kas ir pabeigts par 97% i ir pyrmanūdūšonas stadejā. Paradzāts arī izbraucīns iz byuvnīceibas objektim.

Šudin Daugavpilī, gostneicas “Hotel Dinaburg” ustabuos, nūtiks školānu ādinuošonas pamotprincipim, problemom i izlobūšonas īspiejom velteits reģionalais seminars.Bārni školuos pylnvierteigas pušdiņes aizvīņ bīžuok aizvītoj ar na puoruok veseleigu puortiku – čipsim, limonadu i soldumim. Tuodeļ daudzim jaunim cylvākim rodušuos nūpītnas veseleibas problemas.

Itamā reitā izbraukšonu nu Latvejas Terehovas rūbežkontrolis punktā gaideja 1050 krovys mašinas. Saleidzinūt ar svātdiņes reitu, krovys mašinu rynda Terehovā pasalelinuojuse par 50 spākrotim. Sovukuort Grebņevā izbraukšonu nu valsts itamā reitā gaideja 700 krovys mašinas, kas ir par 120 mašinom mozuok nakai vokor nu reita.

Šudin Daugavpils universitatē (DU) “Krīvu volūdas dīnuos Latvejā” nūtiks starptautiska zinuotniska konference “Krievu valoda starpnacionālajā un starpkultūru telpā”.Konferencē dasadaleis kaidi 60 zinuotnīki nu Krīvejas, Latvejas i Pūlejas.

Latvejas Valsts ceļi (LVC) pluonoj izstruoduot Istras tylta Ludzas rajonā rekonstrukcejas byuvprojektu. LVC par rekonstrukcejas byuvprojekta izstruodi izsludinovusi atkluotu konkursu, kuramā īveiciejs tiks nūsaceits pēc saiminīciski izdeveiguokuo pīduovojuma, jamūt vārā cenu i tehniskū pīduovojumu.