Ībolstuots trešais Valsts prezidents

Saeimas deputati šudin ībolsova Vairas Vīķes-Freibergas sekuotuoju Valsts prezidenta omotā. Atjaunuotuos Latvejis viesturē ituos beja pīktuos prezidenta vieliešonas – ar 58 Saeimys deputatu bolsim par trešū Lavejis prezidentu kliva Valdis Zatlers. Prezidenta omotam beja izvirzeits ari ūtrys pretendents – jurists, bejušais Satversmis tīsys vadeituojs Aivars Endziņš.

Šudin Rēzeknē svineigai atkluos Akceju Sabīdreibays “Augstsprieguma tīkls” zamaškstaceju “Rēzekne”, kas byutiskai uzlobuos elektroenergejis apguodis kvalitati i drūšumu Latvejis austrumu regionā i kas ir nūzeimeigs elektroenergejis tranzita mazgls ar Lītovys i Krīvejis energosistemom.

Šudin prezidente gasteis Daugavpilī, kur Daugavpils universitatē uzrunuos konferences “Policentriskums Latgolā: Daugavpils pīvadums” daleibnīkus i pīsadaleis Strategiskuos analizis komisejis publikacejis “Daugavpils kai atteisteibys ceļveds” atdareišonys svātkūs. V.Vīķe-Freiberga pīsadaleis ari dokumentaluos filmys “Ūtruo pilsāta. Daugavpils” pyrmizruodē.

Itūreit saleidziynuojumā ar vakardīnu kravys mašynu ryndys Terehovys rūbežkontrolis punktā ir sasamozynuojuš iz pusi.Terehovā izbraukšonu nu valsts ryndā gaida 740 kravys auto. Vakar ryndā stuoveja 1500 smoguos mašynys, kas beja ryndu garuma rekords.

Šudiņ, Pasauļa pretpeipiešonys dīnā, Reigā nūtiks koncerts “Apgloboj cigaretis, na sevi!”, ar vysaidu muzykantu uzastuošonu, bet pasuokuma apmeklietuojim byus īspieja izmiereit tvana gazes leimini sovā izelpā, kai ari īspieja atsabreivuot nu sovom cigaretem, kas tiks savuoktys zuorkā i piec pasuokuma ar vysu zuorku nūvastys iz krematoriju. Tys īdūmuots kai simbolisks aplīcynuojums sovu natykumu i atkareibys apglobuošonai.

Šudin Daugavpilī Starptautiskuos bārnu tīseibu aizsardzeibays dīnys pasuokumu ītvorā bārnim nu socialuo riska saimem tiks skaitieta lekceja par uzvedeibys nūteikumim iz iudinim. Taišni itei bārnu kategoreja vysbīžuok teik atstuota bez uzraudzeibys, i jūs drūšeiba atkareiga nu jūs pošu reiceibys.

Vakar Preiļu rajonā nūdaguse kaida privatsāta; varamais aizdegšonuos īmasls – zibiņa spierīns, kurs truopejs sātā. Valsts policijis Presis i sabīdriskūs attīceibu birojā informeja, ka Galēnu pagostā, varams, nu zibiņa spierīņa sadaga sāta i klāvs. Itymā šaļtī eksperti nūskaidroj aizdegšonuos īmaslu.

Laika prognozs šudinei Latgolā: muokūņains laiks, šaļtim skaidruosīs, eislaiceigs leits, vītom pārkiuņa nagaiss, varama krusa. Dīnvidrītumu, rītumu viejš 5-7 metri sekuņdī, nagaisa laikā bruozmains. Maksimaluo gaisa temperatura dīnā +24; +27.