Evika Muizniece DZEJA
Ar bārbijom i kenim pībuozti školys gaiteni –
Vyss ružovūs tūņūs samāzuots.
Tik vīns kokts ar mani
Palics ideālistu naizteireits.
Asu karalīne
Pošys stykla vatis nūtakbedrī.
Par kū es naisaderu nivīnā puzlī?
Dīna nūtak pa drenom
Reit vyss tiks izfiltrāts
I padūts lītuošonai.
Zeimuls ar lizeiku –
Muns puorpalykums ir zaļš, tok lītojams.
Ari seksdīvys
Slapynoj gultā
Paniskā baimē nu vīnatneibys.
Pīsīņ munu naivumu stričeitī
I nūveļc pa asvaļtu.
Tān munys slīcis ir trulys –
Vaira navariešu grīzt papeira sirds.
Tu mani otkon kācynoj
Ar sovim šizofreniskajim skotim.
Man ir paaugstynuots ašņa spīdīns –
par daudz pajiemu tevi iz kryuts.
Nasumynoj mani Vaļuka dīnā
Deļ kam maņ tys banālais sorkonais papeirs
Ar nadzeivu mīlesteibu.
Es grybu eistu sirdi
Ar arterejom, pa kurom
Es varātu pludynuot prūm
Sovus papeira kugeišus.
Ar bārbijom i kenim pībuozti školys gaiteni –
Vyss ružovūs tūņūs samāzuots.
Tik vīns kokts ar mani
Palics ideālistu naizteireits.
Asu karalīne
Pošys stykla vatis nūtakbedrī.
Par kū es naisaderu nivīnā puzlī?
nūmauču saldiejumu –
Bez šykolada nav tik līleigs.
Kopejis dybins saspīž
Pādejū cukra gryudu –
Juoved iz traumpunktu –
Moš lauzta pašapziņa.
Viraka smuords kaitejās,
Svecis līsmā īsamat ružovums,
Juos parafins plyust puor munim byudim
Parodādams osorys.
Ar zīpu burbulim beržu greidys –
Iz tuos tovys avarējis bremziešonys pādys.
Dzili īsaādušs.
Bierneibys olkonuo cereiba
Puorsavierta cukerkā,
Laižās munā vīnatneigajā
Sirdī.
Šimā reitā nūrietejušuo īdvasma
Aizamiersa atslāgys munuos durovuos,
Īguoja atsavadēt,
Tymā vaineigys tovys kriminalatbildeiguos
Bedreitis byudūs.
Reitdīnys uzzīdejušais hronometrs
Syt munam smilšu stundinīkam takti.
Sorkonveinā propulst batarejis –
Vaira nav stimula laikam īt.
Šudiņ iz jumta
Ar Karlsonu iežu zapti.
Myusim keids meta ar ļaunu aci
Truopieja eiforejis epicentrā.
Īplaisuojušu mani moralizēja.
Školys fundaments pīšliuca tyvuok.
I vinolga ..
“Mīru, tikai mīru!”
Bremziešona tože ir vierzeiba.
Paļdis, meilais.
Tev jau gondreiž izadeva nūindēt munu EGO,
Bet dīvam žāl munys nīris
Ir hiperaktivi.
Grybu prosist tevī dyrku, bet
Tovs sapruots ir uorā nu munys jurisdikcejis.
