Emīlija Plātere

Daugovpiļs rajona Leiksnā atzeimej poļaku nacionaluos varūnis dzimšonys dīnu. Šudiņ, 2007.gods 13.novembrī Daugovpiļs rajona Leiksnys pogosta parkā 13 stuņdēs dīnā tiks atkluota pīminis zeime poļaku nacionalajai varūnei Emīlijai Plāterei.

Svineigajā pasuocīnī, kas nūteik taisni Emīlejis Plāteris 201.dzimšonys dīnā, daleibu jims Pūlejis Republikys viestnīks Latvejā Maceks Klimčaks, Latvejis Pūļu savīneibys Daugovpiļs nūdalis prīkšsādātuojs Rišards Stankevičs, kai ari gosti nu Lītovys – Emilejis Plāteris vuordā nūsauktuos Viļņis pamatskūlys puorstuovi.

Pīminis zeime poļaku nacionalajai varūnei Emīlijai Plāterei izveiduota bīdreibys „Līksnas jauniešu kopiena „ KOPĀ”” uzraksteitajam projektam „Saglabāsim Emīlijas Plāteres vārdu nākošajām paaudzēm”. Projekts sajiems atbolstu nu Eiropys Savīneibys programmys „LEADER+”.

Emīleja Plātere Leiksnā pavadieja 14 sovys dzeivis godus. Jei kliva par poļaku un leišu nacionalū varūni 20 godu vacumā, ceinūtīs par Pūlejis apvīnuošonu.