Eiropys žurnalisti gasteis Latgolā

Nu šudinis da 12.majam Latvejā gasteis Eiropys Žurnalistu asociacejis valdis delegaceja. Eiropys Žurnalistu asociacejis valde reikoj sovys siedis vysaiduos Eiropas valstīs, itureiz par siedis vītu izavālāta Latveja. Vizitis laikā žurnalisti tiksīs ar uorlītu ministru Arti Pabriku. Delegaceja planoj apmekliet Reigu, Leivuonus, Daugavpili i Jiekabpili.

Nedelis nūgalē Daugavpilī vys veļ nanūskaidruoti vandali samaitojuši kaidas 30 ceļazeimis. Četrūs gadejumūs ļaundari nūlauzuši bolstus, iz kurim bejušys pīstyprynuotys ceļazeimis. Vēl vairuokūs gadejumūs ceļazeimu bolsti tykuši salīkti i maituotys pošys ceļazeimis. Ceļazeimu remonts pošvaldeibys budžetam izmoksuos kaidus 300 latu.

Šudin i reit Kruoslovys rajona Skaistys pogostā, atpyutys kompleksā “Dridži”, projekta “Baltejis eiroregionaluos sadarbeibas teikls” laikā nūtiks trešuo Latvejis nacionaluo opoluo golda diskuseja i pasuokumi. Šudin opoluo golda sarunys daleibnīki paredziejuš apmekliet zyrgu sātu “Klajumi”. Reit paradzāts izviertēt projekta nūzeimi Latvejis eiroregionu darbeibā, sasnīgumus i izvirzeit aizdavumus atīsmei.

Šudin Kruoslovā nūtiks Nacisma sagruovis i ūtruo pasauļs kara uperu pīminis dīnys pasuokumi, pl.14:00 Kruoslovā pi pīminekļa ūtrajā pasauļs karā krytušajim tiks nūlyktys pučis i nūtiks mīteņš. Arī Daugavpilī šudiņ paradzāta puču nūlikšona karā krytušūs karaveiru pīminis vītā Dubrovina parkā, karaveiru atdusys vītā Vyds Poguļankā, Garnizona kopūs, karaveiru kopūs Gajokā i Bruoļu kopūs Stropūs.

I laika prognozs šudinei Latgolā. Dīnā gaidoms muokūņains laiks. Dīnā leis māranai. Piecpušdinī viejs īsagrīzs nu zīmeļrītumim i pazastyprynuos da 4-9 metrim sekundī, brazmuos 13 metri sekundī. Maksimaluo gaisa temperatura dīnā +13 +15.