Eirodzeive – deļkuo?

Šudiņ Rēzeknē vīsneicys “Kolonna Hotel Rēzekne” telpuos nūtiks diskuseja “Eirodzeive – deļkuo?”, kū reikoj Eiropys komisejis puorstuovnīceiba Latvejā. Diskuseju vadeis Latvejis Universitatis filozofejis doktors Igors Šuvajevs, pīsadola Anna Rancāne i cyti sabīdreibā pazeistami referenti.

Latvejā gastej Eiropys žurnalistu asociacejis delegaceja, vizitis ītvorā šudiņ i reit Eiropys žurnalisti apmeklej Daugavpili i regionu. Krīvu kulturys centrā nūtiks Eiropys Žurnalistu asociacejis delegacejis tikšonuos ar Daugavpiļs dūmis prīkšsādātuoju Ritu Strodi. Sovukuort dīnys ūtrajā pusē gosti īsapazeis ar Daugavpili – apsavērs Bazneickolnu, apmeklēs Daugavpiļs muzeju i Daugavpiļs cītūksni.

Šudiņ Rēzeknē turpynojās kursi regionalajim uzjiemiejim “Biznesa uzsuokšona i finansiejuma īgiušona mozajim i videjim uzjāmumim i jaunū tehnologeju kompanejom”. Pasuokumu organizej Italejis Uorejuos tierdznīceibys instituta Puorstuovnīceiba Reigā. Kursi ir bez moksys i tymūs var pīsadaleit kotrs, kurais dūmoj par sova biznesa uzsuokšonu i atteisteibu.

Daugavpiļs boksa klubā šudiņ i reit nūtiks XV Starptautiskais Leonarda Purvinska pīminis turnirs boksā. Starptautiskajā turnirā pīsadaleis apmāram 80 bokseri nu Latvejis, Lītovys i Igaunejis. Sacenseibys nūtiks treis vacuma kategorejuos: jaunīšim, kadetim i juniorim.

Šudiņ atpyutys vītā “Dridži” svineigai atkluos iudiņsmaršrutu Dridži – Bernātu sola – Sauleskolns. Braucīņa laikā ar īpaši izgotovuotu i apreikuotu plūstu varēs apsavērt azara apkuortni, uzzynuot daudz interesanta par Dīnvidlatgali.

Rēzeknis Augstškolā nūtiks ikgadiejuo augstškolys sporta dīna. Sovu meistareibu sportuot grybātuoji varēs pīruodeit dažaidūs natradicionalūs sporta veidūs. Byus īspieja cīneitīs par titulim „Augstškolys cīneituoja” un „Dzeļža veirs”. Taipat tiks apkūpuoti rezultati individualajuos disciplinuos, kab varātum nūsaceit sportiskuokū augstškolys fakultati.

Šudiņ Kruoslovā, kluba “Krosts” telpuos nūtiks Kruoslovys rajona 5. jaunatnis lelais seminārs “Mes poši”, informej Kruoslovys nūvoda dūmē. Konferencē paradzātys Kruoslovys rajona jaunīšu organizaceju prezentacejis i Kruoslovys rajona Jaunatnis padūmis prīkšsādātuoja uzastuošona, planuots īsapazeit ar vosorā pogostūs planuotajim jaunīšu pasuokumim.

Vakar Rēzeknis Augstškolā jau pīktū godu nūtyka Rēzeknis Augstškolys studentu teatra „ĶerRA” organizietuo veiklūs improvizietuoju sacenseiba aba teatra sports – „Čīkst skatuves dēļi”. Itugod pīsadalie 4 komandys – pa 4 cylvākim kotrā. Dieļus čeikstynuo teatrsporta grupa nu Varakļuonim, „Latgolys radejis” komanda i divejis komandys nu Rēzeknis školānu interešu centrim. Gūdpylnū 1.vītu kai vyslobuokī dieļu čekstinuotuoji īgiva “Latgolys Radejis” komanda, 2. vītu- komanda “Airobika”, bet 3.-“Soldonais puoreits”.