Daugavpilī autobusu bileti byus duorguoki

Daugavpils regionalais sabīdriskūs pakolpuojumu regulators apstyprynuojs SIA “Daugavpils autobusu parks” īsnīgtūs jaunūs puorvoduojuma tarifus. Nu 1.juļa autobusa bilešu cenys piļsātys maršrutūs nu 18 santimim tiks paaugstynuotys da 20 santimim. Vajadzeibu paaugstynuot autobusu bilešu cenys rodusēs saisteibā ar minimaluos olgys pasalelynuošonūs, inflaceju, degvīlys i rezervis daļu sasaduordzynuošonu.

Latgolys apgoboltīsa šudiņ nūlaseis sprīdumu Latvejis Preizticeigūs bazneicys Rēzeknis Vyssvātuos Dīvmuotis pīdzimšonys pareizticeigūs draudzis cyvylpraseibā par eipašumtīseibu atjaunuošonu iz zemi pi Rāznys azara nu Muokūņkolna pogosta padūmis. Draudze gryb atgiut Lipušku pareizticeigūs draudzei pīderiejušū zemi Muokūņkolna pogostā pi Rāznys azara 376,88 hektaru plateibā.

Drupeit aizakavēs Rēzeknis rajona Ūzūlainis pogosta “Križevniekos” Austrumlatgolys atkrytumu apglobuošonys poligona byuvdorbi. Par leiguma pagarynuojuma termiņu i tuoluokū dorbu veikšonu šudiņ lems projektā īsaisteituos pusis.

Leivuonu pošvaļdeiba ituo goda laikā apsajāmuse izstruoduot integrātuos piļsātvidis atteisteibys programu 2008.-2013.godam, nūsokūt treis glvonuos prioritatis: “Inonovativys uzjiemiejdarbeibys veicynuošona”, kurys virzeibu raksturoj uzjāmumu skaita pīaugums; “Dzeivisvidis kvalitatis uzlobuošona i vidis ilgtspiejeiga atteisteiba”, kū raksturoj teira, estetiski pīviļceiga vide i sakūpta apkuortne; kai trešuo prioritate ir nūruodeita turisma atteisteiba, kuramā ītverta kulturvidis turisma atteisteiba i aktivuo turisma atteisteiba.

Rēzeknis rajona pogostu prīkšsādātuoji nūruodejuš, ka lauku dzeivuotuoju veseleibys apryupei feldšeru-vacmuošu punktus slēgt navajadzātu, bet vajadzātu tūs sertificēt. Septeni nu 43 feldšeru-vacmuošu punktim Rēzeknis rajonā ir sajāmuš projekta naudu sertificiešonai – pastotys īguodei i remontam.

Ludzys pošvaldeiba itūgod veic lelus pludmales laobīkuortuošonys dorbus ludzānīšu īcīneituokajā peldvītā – Mozajā azarā, kur tiek uzstuodeitys bārnim šyupelis i kūka atrakcejis, kai ari četrys lapenis senlaiceigā stylā.

Šudiņ Rēzeknis 1. vydsškolā suoksīs i da 15. juņam turpynuosīs dīnys atpyutys nūmetne “Skaņburdīnys-4”, bārnim vacumā nu sešu da divpadsmit godu. Dorbs nūmetnē byus veļteits golvonūkuort volūdai i literaturai – bārni laseis gruomotys, zeimēs literarūs varūņus, skandēs folkloru i arī poši sacerēs daiļdorbus.

Zinis sagataveja: Laura Sondore