Daugavpilī atkluots mikroskopejis centrs

Šudiņ Daugavpiļs Universitatē tiks atkluots vīns nu leluokajim Latvejā Inovativuos mikroskopejis centrim. Mikroskopejis centrs izveiduots, realizejūt ES strukturfondu Nacionaluos programys projektu “Daugavpiļs Universitatis Inovativuos mikroskopejis centra izveide”. Universitatem izvirzeitūs praseibu zynuotnis pietejumūs DU par vīnu nu svareiguokajim uzdavumim izvirzie spieju panuokt jaunu zynuošonu fizikā, kimejā, biologejā, palelynuot pietnīku skaitu i koncentrēt resursus.

Šudiņ Augstuokuo tīsa izskateis Rēzeknis bejušuo mera, tāņejuo dūmes prīšksiedietuoja vītnīka Jura Začesta apelacejis kuorteibā īsnīgtū syudzeibu par Latgolys apgoboltīsas sprīdumu lītā par bolsu īpierkšonu pošvaļdeibu vieliešonuos Rēzeknē. Tīsys sprīdumu Začests puorsyudzejs, jo kategoriski nūlīdz sovu saisteibu ar bolsu pierkšonu Rēzeknē. Pārn Latgolys apgoboltīsa Začestu atzyna par vaineigu personu apzynuotā kaviešonā breivi realizēt tīseibys vielēt i pīsprīde naudys struopi 40 minimalūs mienešolgu apmārā.

Šudiņ Jākubpiļa kūkapstruodis uzjiemiejdarbeibys parka telpuos nūtiks investiceju pīsaistis i eksporta veicynuošonys vaicuojumim veļteits seminars. Seminarā uzjiemiejim byus īspieja tiktīs ar Latvejis Investiceju atteisteibys agenturys specialistim i uzzynuot par dažaidom eksporta īspiejom.Uzjiemieji tiks informāti par Latvejis Investiceju i atteisteibys agentūrys Investiceju pīsaistis i tierdznīceibys veicynuošonys departamenta snīgtajim pakolpuojumim.

Rēzeknis piļsātys dūme pījāmuse lāmumu par kūpeiga Rēzeknis piļsātys i rajona Tūrisma informācejis centra izveidi. Da šam Rēzeknis pusē Latgolys gostim beja zynoms Rēzeknis rajona Tūrisma informācejis centrs “Untumi”, bet jau dreiž durovys vērs Rēzeknis piļsātys i rajona Tūrisma informacejis centrs, kas atsarass pošā Rēzeknē. Rēzeknis Dūme nūlieme pīškiert finansejumu 7879,80 latu vierteibā. Tūrisma informacejis centra izdavumu segšona nūtiks savstarpejū nūriekinu kuorteibā, i leidzeiguos daļuos tū veiks gon piļsātys dūme, gon rajona padūme.

Augstuokuos tīsys Senats vakar atstuoje spākā sprīdumu, ar kurū apmīrinuota uzjiemieja Grigorija Ņemcova praseiba i krīvu volūdā iznuokušajam laikrokstam “SeiČas” uzdūts atsaukt 2005.goda decembrī publycātuos zinis par Ņemcova it kai nasamoksuotajim nūdūklim i jam pīmāruotū 100 latu naudys struopi.

Paguojušajā dīnnaktī guņsgrākūs Latvejā cīte pīci cilvāki, vakar vokorapusē Daugavpilī elektreibys eissavīnuojuma dieļ aizadaga kūka šķiuneits i garaža. Itymā guņsnalaimē cīte ’68. godā dzims veirīts, kurais dabuovs 70% ķermiņa apdagums, vēļ vīns veirīts īvītuots slimineicā ar golvys apdagumim, bet veirīts, kuram beja rūkys apdagums atsasacie braukt iz slimineicu.

Nu 2. da 30 apreļam Rēzeknē byus tradicionalais piļsātys sakūpšonys, jeb spūdreibys mieness. Itys ir laiks, kod pošvaļdeiba seviški mudynoj īdzeivuotuojus i organizacejis sakūpt sovu i sovim īpašumim pīgulūšū teritoreju, kab dareitum smukuoku Rēzeknis piļsātu. Turkluot, kai Latgolys radeju informej Rēzeknis piļsātys dūmis sabīdriskū atīceibu nūdaļis vadeituoja Diāna Zirniņa, piļsātys izguoztuvē “Ritiņi” itymā laikā atkrytumus nu īdzeivuotuojim, kurī tūs atvess ar vīglū mašynu pīkabem, pījims bez moksys. Sovukuort nu organizacejom, uzjāmumim i īstuodem atkritumus pījims ar 50 % atlaidi.

Vuocu volūdys populariziešonys nūlyukūs šudiņ Daugavpiļs Universitatis aktu zalā ar izruodi “Makss un Morics” gastej “Muzikālais teātris 7”. “Makss i Morics” ir myusdīneiga muzykala izruode, kas īstudāta latvīšu i drupeit vuocu volūdā. Izruode dūmuota vysa vacuma skateituojim – školānim, jūs vacuokim i školuotuojim.

Jaunūs izpiļdeituoju konkursā Boltkrīvejis Lidas piļsātys muzykys vydsškolā, 2. vītu izcīnejs A. Žilinska Jākubpiļa muzikys školys 2. vijūlis klasis audzieknis Valts Urtāns. Kai Latgolys radejai atzyna Jākubpiļa piļsātys dūmis presis sekretare Aiga Sleže, konkursā beja puorstuovātys vairuok nakai 10 muzykys školys nu Boltkrīvejis, Grodnis apgobola i daleibnīki sazacentēs vairuokuos muzykaluos specialitatēs.