Cik lelu koncertzali vajag Latgolā?

Īspiejams, vīna nu pīcom daudzfunkcionalajom koncertzalem atsarass Latgolys regionā. Jau paguojušuo goda nūgalē Rēzeknis piļsātys dūme, uzskotūt, ka tryukst pīmāruotu telpu leluoku koncertu reikuošonai, kai ari dažaidu pasuokumu nūtikšonai, konceptuali atbaļsteja koncertzalis byuvnīceibu. Atbolstu koncertzalis byuvnīceibai izsacejuš ari vairuoki kulturys nūzaris puorstuovji Latgolā.

Bolvu rajona Žīguru pogostā piec gāzis spruodzīņa kaidys saimisteibys pyunī vakar cīts sātys saiminīks, 46 godus vacs veirīts, kurais dziešūt guņsgrāku dabuojs apdagumus. Pyunī atsaroduse “Ford” markys mašyna, nu kurys gāzis sistemys rodusēs nūplyude. Pyunī vēļ atsaroduš pīcys propana gāzis kanys, reakcejis rezuļtatā nūtics spruodzīņs, piec tam izacieļs guņsgrāks 105 kvadratmetru plateibā.

Šudiņ, vysdreižuok ka nanūtiks pošvaļdeibys a/s “Daugavpiļs syltumteikli” nakustamūs eipašumu izsūle, deļ tuo ka nav pīsasacejs nivīns pretendents. Izsūlē beja planuots puordūt zemis gobolu ar kūpejū plateibu 14 657 kvadratmetri i iz tuo asūšuos 11 sātys Ordeņa īlā 39. Nakustamuo eipašuma nūsaceituo suokuma moksa 140 tyukstušys latu.

Nu šudiņdīnys da 6. juļam Preiļu rajona Aglyunyis pogosta Jaunaglyunā nūteik Jaunsardzis 15. godadīnys saliduojums, kuramā daleibu jam vairuok nakai 1000 daleibnīku nu vysys Latvejis, kai ari nu Lītovys, Igaunejis, Zvīdrejis i Lelbritanejis.

SIA “Alterf” planoj puordūt treiszvaigžņu vīsneicu “Biplan hotel” Daugavpilī. Iz itū breidi veiksmeigi struodojūšais uzjāmums teik puordūts ar mierki dabuot leidzekļus kaida leluoka ar turismu i vīsneicu biznesu saisteita projekta realizacejai Latgolā. Vīsneicu planuots puordūt par 800 tyukstušom latu.