Burts E (Volūdys Vaicuojums)
Loba dīna!
Šudiņ alfabeta kuorteibā ir reize burteņam “e”. Itys nav puoruok izplateits i īpašajim vuordim boguots burts, ar kuru suoktūs naskaitami leksiski nu lejslatvīšu piļneigi atškireigi vuordi, bet nasaverūt iz tū, ari itam burtam ir sovi pīkritieji voi kai tagad sauc – fani myusu volūdys kruojumā.
Suoksim vysupyrma ar vītu vuordim: Eglaine, Egli, Egļova, Egļucīms, Eļkšni, Ereli, Eša azars, Ezereni, Ezernīki, Eiduki, Eisaki, Eisuli…
20. julī Latgolys bazneicuos teik svynāta profeta voi pravīša, Vacuos Dereibys puorstuova Bībelē svātuo Eliaša dīna. Nu bierneibys pīmiņu, ka babeņa, kod nūsabeiduse praseju, lai kū pastuosta par tū, kas nūteik dabasūs pārkiuņa laikā, jei saceja navys tū vysbīžuok dzierdātū atbiļdi, ka Dīveņš borās, bet gon tū, ka pravīts Eliašs guņs rotūs pa dabasim braukoj… Tī gon munā iztēlē atsakluoja taida kruošņa redzis glezna, ka iz breisneni i par bailem aizamiersa…
Bet… na jau viņ īpašvuords Eliašs, kura nosuotuojs Latgolā pazeistams Bazneicys tradicejā i ir mynāts jau Andriva Jūrdža „Myužeigajā Kalinderī”, suocās ar burteņu e, ir myusu volūdys kruojumā taidi vuordeni kai: eļsinēt – elsot, ereļs – ierglis, eilyns, eilineņš – īlens.
Sovukuort vuords eikss (īkšķis) apzeimej ekstremitašu lelūs pierstus, bet vuords eikss (niere), eikši ( nieres) ir ari vīns nu svareiguokajim organim cylvāka tik sarežgeitajā kermiņa sistemā.
Ir vuords eglis ar nūzeimi ecieža, sovukuort vuords ecētīs, eceišonuos ir palics par sinonimu vuordim streideišonuos, encēšonuos.
Ar vuordu eņdžis apzeimej durovu eņģes, a tū, ka taids pavysam eistyns draugs var byut tikai vīns, saprūt ari mozais Boņuks Juoņa Klīdzieja i Juoņa Streiča filmā „Cylvāka bārns”.
Ari tautā popularajai dzīsminīka Pītera Miglinīka vuorsmai pīdzīduojums skaņ:
Ei, ei nabādoj,
Ceiņā vysu giusim!
Osorys kas bierdynoj,
Napaleidzēs myusim.
Tai ka lobuok ceņssimēs byut breivi i naatkaraigi kai ereli voi iergli gaisā, koč i tymā pošā laikā tys nanūzeimēs, ka dzeivuosim kai eikši voi nīris taukūs.
Ar tū Volūdys vaicuojums ir izskaniejs, paļdis ka klausējitēs. Vysu lobu!
