“Borowa MC” sajims “Zalta disku”
Latgalīšu modernuos muzykys grupa “Borowa MC” niu var lepuotīs ar vēļ vīnu sasnāgumu, grupys debejis albuma “Trepis iz nakurīni” puordūtūs kopiju skaits puorsnīdzs 5000 i tys nūzeimoj, ka grupa sajims “Zalta disku”. Kompaneja “Mikrafona īroksti” planoj, ka oficialuo diska pasnīgšona nūtiks 17.majā, kod tiks prezentāts grupys jaunais albums “Plastilina pasaule”.Šudiņ trejuos stuņdēs invalidu bīdreibys “ILGAS” telpuos Daugavpilī septeni cylvāki ar eipašom vajadzeibom prezentēs sovus biznesa planus, kurī topuš piec kursu “Komercdarbeibys uzsuokšona” apmekliejuma. Kursi tyka organizāti projekta “Biznesa pamati cilvākim ar eipašom vajadzeibom” ītvorā. Projektu leidzfinansej ES. Projekta kūpejuos attīcynomuos izmoksys ir drupeit vaira kai 21000 latu.
Vēļ šudiņ Jākubpiļa piļsātys dūmis prīkšsādātuojs L.Salcevičs kūpā ar puorejū Latvejis Lelūs piļsātu dūmju prīkšsādātuojim atsarūnās dorba vizitē Spānejā, Bilbao. Braucīni organizej Latvejis Lelūs piļsātu asociaceja i tuo nūlyuks ir īsapazeit ar vītejuos pošvaļdeibys, nacionaluos vadeibys i privatuo sektora sadarbeibys pīredzi piļsātvidis uzlobuošonā, rodūt jaunus kulturys infrastrukturys objektus. Šudiņ piļsātu merim planuota Guggenheima muzeja apskate i tikšonuos ar tuo generaldirektoru.
Latgolys apgaboltīsa šudiņ nūlaseis saeisynuotū sprīdumu Pīvīnuotuos vierteibys nūdūkļa izkruopšonys lītā, kuramā cītušuo puse ir Vaļsts ījāmumu dīnests. Apsyudzātī ir registriejuš firmys i pastuov aizdūmys, ka apsyudzātī dorbuojušīs ar fiktivim dokumentim i pavadzeimem, kab izkruoptu nu vaļsts budžeta akcizis nūdūkli drupeit vaira nakai 40000 latu apmārā par nūsaceitu laika periodu 2003.godā.
Šudiņ Jākubpiļa dūmis darbinīku delegaceja dūsīs pīredzis apmainis braucīnī iz Cēsim. Cēsīs jākubpilīši īplānuojuš apmeklēt piļsātys dūmi, īsapazeit ar izgleiteibys, kulturys i sporta komiteju dorbu, ar pīcus i sešus godus vacu bārnu obligatū sagotovuošonu pamatizgleiteibys apgivei, vītu sadali pyrmsškolys izgleiteibys īstuodēs i citim vaicuojumim.
Šudiņ Rēzeknis dūmis darbinīki pīsadaleis AS “Latvejis vaļsts meži” (LVM) reikuotajā kūku stuodeišonys tolkā Dukstigalā, Rāznys nacionaluo parka teritorejā, Latgolys radeju informej Rēzeknis piļsātys dūmis Sabīdriskūs attīceibu nūdaļa. LVM Zīmeļlatgolys izpylddirektors Viktors Reblis pastuostie, ka tolkā pīsadaleis ari Rēzeknis regionaluos vidis puorvaļdis, Rāznys nacionaluo parka i pošu mežsaimnīceibys darbinīki. Planuots īstuodeit egleitis apmāram vīna hektara plateibā.
Šudin slīžu remonta laikā dzelzceļa pūsmā Vabale-Leiksna maineits Daugavpiļs vilcīņu kusteibys grafiks. Remonta laikā nakursies dīzeļvilcīņs Reiga-Daugavpiļs ar atīšonas laiku 13:00, kai arī Daugavpiļs-Reiga ar atīšonas laiku 13:07.
