Apstyprynuoti vēļ treis Latgolys Studentu centra projekti
![](https://lpr.gov.lv/wp-content/uploads/2005/dezuratteli/23.jpg)
Niuļa nūteik vajadzeigūs dokumentu sagataveišona, lai tyktu paraksteiti leigumi par projektu īvīsšonu. Pyrmī diveji projekti byus juoeistynoj jau itamā godā, trešais leidz nuokušuo goda apreļam.
Projekta „Latgalīts Latgalīšam Draugs” (saeisynuotai projektu var saukt par „La-La-Dra”) ītvorā Daugavpiļs rajona školuos i pogostūs tiks sareikuoti vairuoki literari-muzykali pasuokumi ar latgalīšu ailinīku (dzejnīku) i muzykantu pīsadaleišonu. Tiks aicynuoti ari vītejī pogostu školnīki i sabīdriski aktivī ļauds pīsadaleit itaidūs pasuokumūs ar sovim latgaliskajim prīkšlasejumim voi muzykys skaņom.
Jau tagad ir uzsuokti sagataveišonys dorbi projekta veiksmeigai īvīsšonai, īinteresātī Latgolys Studentu centra (LgSC) bīdri var pīzasaceit paleigūs pa e-postu: lgsc@latgale.lv voi pa telefonu: 26393531.
Jauna datortehnika tiks īguoduota leluokuo projekta („Latgolys Studentu centra apreikuojums i dorba mobilitate”) laikā. LgSC īgius dorbam jaunus datorus, projektori, printerus, skanerus, digitalū fotoaparatu i cyta veida biroja apreikuojumu, kas paleidzēs atteistēt LgSC darbeibu, kai ari dūs praktisku atbolstu cytu projektu sagataveišonai.
Vysa beiguos cytu god tiks sareikuots latgalīšu organizaceju kongress, kuramā aicynuosim kūpeigim spākim izstruoduot reiceibys planu i strategiju tuoluokajom latgalīšu aktivitatem.
Juoatzeimej, ka ituo goda pavasarī pavysam tyka sagataveiti seši projektu pīteikumi i vysi īsnāgti Daugavpiļs rajona partnereibai, kas beja dabuovuse īspieju rajonā organizēt projektu konkursu saskaņā ar Lauku atbolsta dīnasta īvīšamū Eiropys Savīneibys atbolsteitū aktivitati „Integrātuos lauku atteisteibys izmieginuojuma strategijas”. Vēļ treis projekti natyka atbaļsteiti, bet tūs tod byus juopaloboj, juopapyldynoj i juomeiginoj snīgt cytamūs projektu konkursūs.
Kai ari jau ir apzynuotys jaunys īspiejis, kur var īsnīgt projektus, deļ tam vysi, kas gryb īzasaisteit projektu raksteišonā i apgiut, kai tys dorams, sazynojit ar LgSC vaļdi.