Nu īprīkšejuos bleivplatis “Sieju sovu” izīšonys paguojs pusūtrys gods, lānai suocīs dorbs pi jauna albuma, kas veļteits Godskuortu īražu dzīsmem. Obejis jaunuos dzīsmis ir kai puorīšona storp programom, atguodynojūt, ka “Rikši” nikur nav pagaisuši.

Dzīsme “Visu gadu Jānīt’s nāca” īt nu Vydzemis i ir jaunuokais grupys veikums. Tamā ar drupeit rūtaleigu īzeimi atsakluoj dalinīku izjiutys par goda eisuokuos nakts nūtikšonom, emocejom i izdareibom. Zeimeigai, ka, koč i pādejūs godūs cīša sadarbeiba, draudzeiba i koncertdarbeiba “Rikšim” bīži nūteik taišni Vydzemē, itei ir vīna nu pyrmajom grupys Vydzemis dzīsmem, kai ari tik trešuo, kas īraksteita latvīšu literarajā volūdā.

“Sanuocit i Juoņa bārni” grupys repertuarā ir jau gondreiž nu pošu “Rikšu” pyrmsuokumu. Reiz atrosta kaidā latgalīšu tautysdzīšmu būrtneicā, dzīsme iz laiku nūklusa nu jaunīšu repertuara, tok viņgod veiksmeigai atsagrīzuse apritē. Grupai ruodīs, ka itei ir eistuo šaļts nūdūt Latgolys vosorys ļustis sajiutys leluokai auditorejai.

Vairuok informacejis: www.lakuga.lv