Laura Bicāne izdūd trešū albumu “Lauzīsimies cauri pūlim”
Dzīsmineica Laura Bicāne izdūd trešū albumu “Lauzīsimies cauri pūlim”, kurymā atrūnamys 10 kompozicejis latviski, latgaliski i angliski.
Laura Bicāne ir dzīsmineica nu Daugovpiļs nūvoda Vyškim. Vairuoku godu laikā izkūpuse sovu daiļradi, koncertiejuse, kai ari izdavuse div studejis albumus: “Es tikai ļaujūs” (2013) i “Trīspuksti” (2015). Niu dīnysgaismu īraudzeis trešais albums “Lauzīsimies cauri pūlim”.
Albuma vadmotivs atkluots tuo nūsaukumā. “Lauzīsimies cauri pūlim” ir fraze nu dzīsmis “Skolotāja šūpoles”. Dzīsme radeita, Laurai suocūt dorbu školā. Sasadurūt ar tik kruosainu kasdīnu, kū pīduovoj školys dzeive, rūnās sajiuta, ka esi pasvīsts gaisā kai leigačuos. I kai tik kuojis dasadur pi zemis, ir juosadūd iz prīšku apjiemeibys pylnam, kod nakod maudojūt ari pret straumi. Taida ir tei lausšonuos cauri pyuļam.
Albumā īkļautys četrys dzīsmis latgaliski: “Māraukla”, “Tī byusim mes”, “Satikšonuos” i “Myužeņš jauns” (ar O. Slišāna dzeju). Dzīsme “Māraukla” radeita puordūmuos par vajadzeibu izškiert lītys, kuruos dzeivē vad pa moldu celim i kuruos atkluoj patīseibu. “Tī byusim mes” sacerāta bruolāna Kristapa kuozom; tei stuosta par liktineigu īsapazeišonu i lelū dīnu, kod mīlesteiba mīļuotuoju storpā poša līcynoj par sevi. Dzīsme “Satikšonuos” pīraksteita seņ, kai veļtejums kaidam vuocu draugam. Tei atdzymuse kaidā dīnā, Laurai najauši sateikūt veikalā cylvākus, kurūs tamā dīnā cytaiž nikod nabyutu īsadūmuojuse satikt. Tī beja div latgalīšu prīsteri ceļā iz tuolū Italeju. Sovukuort “Myužeņš jauns” roduos festivalam “Upeitis uobeļduorzs” i vāluok tyka īraksteits kūpā ar postfolklorys grupu “Rikši”.
Div dzīsmis angļu volūdā “Stop” i “Home” Laurys dzīšmu skreineiti papyldynuojušys naseņ. Dzīsme “Stop” viestej par div vierzīnim. Vīns nu tūs vad iz augšu, iz izaugsmi, ūtrys – iz leju, degradaceju. Saucīņs “stop” ir aicynuojums apsastuot i pasavērt, kurā vierzīnī aizrit dzeive. Tys nav vīgls aizdavums, partū ka moldynūšais ceļš nareši ir taiduos pošuos gaišuos kruosuos kai patīsais. Sovukuort dzīsme “Home” ir cīši personeiga. Tei ir ilgu atspīgeļuojums piec sovys sātys, jaunizveiduotys saimis. Vysbeidzūt tuos ir ilgys piec myužeibys, kur ir patīsuo piļsāta, iz kurū sirds snādzās puorsaceļt.
Albuma dzīšmu kluostu papyldynoj dzīsme “Samuēls” – stuosts par puisānu, kas simbolizej dzīsminīka pagaisynuotū muzu. “Uzticamais draugs” ir sirsneiga dzīsme par draudzeibu. Nareši dzeivis gryutajuos šaļtīs pasaruoda itī “uztycamī draugi”. Varbyut nuokušajā dīnā juo vairs nabyus kluotyn, tok kod reizi nadīnā nivīna drūsa atbolsta placa nabeja, itys draugs palyka uztycams.
Albumu nūslādz instrumentals saceriejums flautai, klarnetei i klavīrem, papyldynuots ar modernu sytaminstrumentu pavadejumu.
Laura sevi pīruodejuse muzykā Eirovizejis nacionalajā atlasē, pīsadalejuse vysaidūs muzykys i kulturys projektūs: “Jauna slavas dziesma”, “Muzeju nakts”, “Baznīcu nakts”, “Muzykys skrytuļs”. Laura sasadorbojās ar vairuokom grupom, par pīmāru, latgalīšu pozitivuo roka grupu “Dabasu Durovys” i legendarū grupu “ELPA”. Laurys bolsu var dzierdēt ari televizejā, Reigys Adventa muzykys svātku i projekta “Latvijas lepnums” ītvorūs. Ari iz prīšku dzīsmineica planavoj aktivai dorbuotīs muzykā i nest Daugovpiļs nūvoda i Vyšku vuordu tuoļuok Eiropā i pasaulī.
Albuma prezentacejis koncerti paradzāti 20. majā Vabalī, Skryndu dzymtys muzejā, 25. majā Daugovpilī, “Park Hotel Latgola” restoranā “Plaza”, 2. junī Lūznovys muižā i 10. junī Reigā, DAD cafe.
Informācija no: www.lakuga.lv
