Doncova Kazaku, Subotu, Jabločku, Korobočku i cytus daņčus
![](https://lpr.gov.lv/wp-content/uploads/2007/pasuokumi/2136.jpg)
Apvuiceibu mierkis beja padzilinuot teoretiskuos i praktiskuos zynuošonys, kas saisteitys ar daudzpuoru deju folklorys sluoņa izpratni, kai ari īgiut nūdereigys praktiskuos īmanis. Sovuos zynuošonuos i pīredzē dalejuos Latvejis Universitatis deju folklorys kūpys „Dandari” dalinīki i vadeituoji – Ilmārs Pumpurs i Dace Circene. Seminara rezuļtatā Kolupa i Ambeļu deju kolektivu i folklorys kūpys „Dyrbyni” dalinīki īsavuiceja gon Bukmuižys i Rikavys kadrilis, kai ari taidus daņčus kai Kazaku, Subotu, Jabločku, Korobočku i cytys.
Seminara laikā sovys prasmis varēja pylnveiduot ari dažaidus tautys instrumentus spielejūšī jaunīši, sovulaik tradicionaluos dzīduošonys nūdarbeibys laikā Ilzes Mežnieces vadeibā jau tyka izdzīduotys tyvojūšūs Leldiņu dzīsmis. Sastdinis vokorā folklorys kūpu dalinīki reikova daņču vokoru, kurs beja atvārts daņču pratiejim i interesentim.
Folklorys kūpu „Dandari” i „Dyrbyni” i Kolupa i Ambeļu deju kolektivu sadarbeiba plānuota ari turpmuok, gatavojūtīs 2. folklorys deju festivalam „Pa Pēteriem”, kurs itūreiz nūtiks Daugovpiļs nūvoda Dubnā i Reigā ituo goda 2.-4. julī.
Daudzpuoru deju apvuiceibys reikova Latvejis Universitatis deju folklorys kūpa „Dandari” sadarbeibā ar Daugovpiļs nūvoda Kulturys centra folklorys kūpu „Dyrbyni”. Seminaru atbaļsteja Vaļsts Kulturkapitala fonds i Daugovpiļs nūvoda Kulturys puorvaļde.