Škierstele

Daudzejuom ļaužu driebiem škierstele ir vysai nūdereiga. Kai juotnīki siedeitu sadlūs iz zyrga mugarys, ka jūs šineļīm nabyutu škierstelis? Kai meitys ar šaurīm brunceišīm pastaiguotu, ka nabyutu suonūs, prīškā voi pakaļā škierstelis?

Meitu driebu škierstelis cīžuok pateik puišīm. Pa juom var kūta i vairuok pamaneit meitu mīsuos. Vyspuor, škierstele daudzikur i daudzireižu ir tei vīta, car kurū var īraudzeit slāptū patīseibu, pareizuok – eistīni.

Par škiersteli var saukt i Saeimys vieleišonys. Pa itū škiersteli izbierst i pasaruoda vysīm taidys mīsys i gora padareišonys, kas ikdīnī nav radzamys …

Par škiersteli var saukt i augstūs tīsu procesus. Pa tuom škiersteliem pasaruoda taidys delys, kaidys tu daže sapynūs navareji īraudzeit …

Par škiersteli var saukt i dīnugruomotu publiceišonu. Tymuos atsakluoj taida eistīne, kaida vysu laiku ir bejusi pučeities īlykta i naīraudzeita …

Loba dela ir škierstele. Nav juoplieš, juosyt, voi juoatkeilej vyss. Pašker škiersteli i vysu radzi i izzyni. Apmīrynuojums pruotam i mīsai. Kai soka – bauda i suopis ir tuos, kas cylvākūs uztur myužeigū pošsasaglobuošonūs.

Vairuok škiersteļu, vairuok baudys. Vairuok škiersteļu, vairuok suopu. Taitod – vairuok patīsys, nasamuoksluotys dzeivis i izdzeivuošonys.

Daudzejīm napateik škierstelis. Napateik i vyss. A dieļ kuo napateik? A dieļ tuo, ka jīm žāļ, ka jīm skauž, ka vysi byus laimeigi voi nalaimeigi vīnaiž vīnaidi. Škiersteļu nagrybātuoji cer byut vīneigī laimeigī viers zemis …

Paradeisim vairuok škiersteļu i nabyus križu, nabyus navajadzeiguos atkeileišonys tī, kur keiluma navāg.

Ceceļānu Ontiks