Veiskupa vizitaceja Dagdys nūvodā
29. junī, Pīterdīnā, Aglyunys-Rēzeknis diecezis veiskups Juoņs Buļs īsaroda vizitacejā iz Bukmuižys draudzi (Ezernīkūs Dagdys nūvodā).Veiskups vadeja misi latgaliski un aicynova kūpeigi lyugt par vysim kluotasūšajim ļaudim, eipašu svieteibu dūdams bārnim i jaunīšim. Muoceibā J. Buļs lyka uzsvoru iz eistynys ticeibys spāku, kai ari aicynova ļauds iz gūdeigu Dīva vuordu paklauseibu. Misis laikā tyka īstyprynuoti bārni i jaunīši. Par gūdu veiskupa īsarasšonai nūtyka i proceseja ap bazneicu – paļdis juosoka vysim juos dalinīkim.
Misis nūslāgumā veiskups izsaceja pateiceibu draudzei, draudzis prāvestam, īdzeivuotuojim i pošvaļdeibai par īguļdejumu, sakuortojūt bazneicu i juos apleicīni.
Nu pādejuos veiskupa gasteišonys Bukmuižā paguojuši desmit godi, tok J. Buļs izsaceja nūceju (cereibu), ka nuokūtnē jam izadūs dūt svieteibu ituos pusis ļaudim kluotīnē vēļ kod na viņ. Veiskups aicynova kasdīnā izmontuot “Latgolys Radeji” i nūsaklauseit Dīva vuordus i tod, ka nav īspiejis tikt iz bazneicu. Draudze par pīmini nu ituos vizitacejis veiskupam duovynova gleznu ar Bukmuižys bazneicys attālu.
