Breivūs ļaužu apvīneiba „Latgolys Saeima”
![](https://lpr.gov.lv/wp-content/uploads/2006/baneri/974.gif)
„Latgolys Saeima” īzastuoj par vīnuoteibu vysu latvīšu vydā Latvejis vaļsts atteisteibai i tūs princypu īvāruošonai, kuri ir myusu kūpejais montuojums nu Latvejis vaļsts izveiduošonys pyrmsuokumim. (1917.goda Latgolys I kongresa lāmums: „Mes, Latgolys latvīši, apsavīnuodami ar Kūrzemis un Vydzemis latvīšim, paturēsim sovu pošvaļdeibu, pylnu pošnūteikšonys tīseibu volūdys, ticeibys, školu un saimesteibys, kai ari zemis vaicuojumā…”)
Deļ tam „Latgolys Saeima” par sovys darbeibys pamatvierteibom izvyrza: latgalīšu volūdys interešu aizstuoveibu, myusdīneigys izgleiteibys sistemys atbolstu, kai ari vaļsts varys decentralizacejis procesa veicynuošonu – regionalu pašvaļdeibu izveidi, kab nūdrūšynuot Latgolys ekonomisku atteisteibu i latvisku (latgalisku) Latgolu ar kulturys vierteibu nūsorguošonu nuokamajom paaudzem.
Sabīdreibai vajadzeigs objektivs i kritisks redzīņs iz Latgolu puorstuovūšū politiķu darbeibu. Leidzšinejuos reiceibys izviertejums i kūpeigs redzīņs par tuoluoku regiona interešu puorstuovnīceibu vysūs vaļsts leimiņūs. „Latgolys Saeima” paredz gatavēt i publicēt rokstus par sabīdreibai svareigim tematim.
Apvīneiba „Latgolys Saeima” veiduotīs suoce 2009.goda vosorā i niu tymā isasaistejuši: Jurs Viļums, Ilga Šuplinska, Imants Slišāns, Valentins Lukaševičs, Guntis Rasims, Maruta Latkovska, Arturs Uškāns, Janīna Kursīte, Ontons Slišāns, Oskars Orlovs, Gunta Mežule, Rolands Piļka, Valdis Viļums, Juoņs Rimšāns, Juoņs Rutka, Arnis Slobožaņins, Elmārs Ciganovičs, Edmunds Kadakovskis, Oļegs Anosovs, Harijs Bernāns, Valdis Labinskis, Laura Sondore, Andris Slišāns, Eriks Kondrats, Arvids Turlajs, Ruta Daniļeviča, Sanda Čingule, Daiņs Platacs i citi aktivi latgalīši.
Īzasaisteit teik aicynuots sevkurš cylvāks, kas aplīcynoj sovu gataveibu sasadorbuot „Latgolys Saeimys” izvirzātūs princypu īvāruošonā, kai ari sovu lāmumu pījimšonys naatkareibu nu sevkura finansiala voi politiska spāka.
„Latgolys Saeima” atbolsta ari cytu bīdreibu izsaceitū pīprasejumu par kvalitativu, atvārtu politiku vaļsts leiminī i aicynoj sabīdreibu iz aktivu leidzdaleibu, aicynoj kūpā dareit aktivus cylvākus vysā Latvejā, sasadorbuot regionūs i vītejuos pašvaļdeibuos. Vaļsts vara pīder tautai!
Breivūs ļaužu apvīneiba „Latgolys Saeima”,
latgolyssaeima@gmail.com, 26393531