Rūkys nūst nū Daugovys!
Atvārtuo viestule
Gūduotīs Vaļsts Prezident, Valdi Zatler!
Gūduotīs Saeimys prīkšsādātuoj, Gundar Daudze!
Gūduotīs Ministru Prezident, Valdi Dombrovski!
Gūduotī Latvejis pošvaļdeibu vadeituoji i deputati!
Ituo goda janvarī avanturistu grupa, kas sevi sauc par a/s „Ūdens enerģētikas un transporta sistēma Rīga – Hersona – Astrahaņa” suokuse parokstu vuokšonu reperendumam par myusu kūpejuos montys Daugovys privatizaceju. Itī ļauds grib tyvuokajā laikā Latvejis liktina upi sataiseit kugojamā, i tys nūzeimej, ka ari cīši nateirā kanalā da pošai Malnajai jiurai. Jī grib uzslīt treis jaunys Daugovys spākstacejis, tai zam iudina pabuožūt vairuokys apdzeivuotuos vītys i naatgiustamys dobys ainovys. Jī sūla, ka Jākabpili sataiseis par ūstu, bet tys nav izdorams, mīstu pa prīšku naappludynojūt i naizpūstūt. Bez tuo vysa, jī grib struoduot kūpā ar Boltkrīvejis diktatora Lukašenkys režimu i kai koncesionari nū puorejim par Daugovys lītuošonu sajemt naudu.
Moz tycams, ka taida plana sataiseišonu i Daugovys iznycynuošonu ļaus vītejuo ļaudeiba i Eiropys Savīneiba. Juouzatrauc, ka pēc 1987. goda Daugovpiļs HES projekta ekologiskuos i ekonomiskuos ekspetizis, kod storptautiska zynuotnīku komiseja pat vīna jauna aizsprūsta byuvēšonu atzyna par nuovējūšu upis pošatteireišonuos spējai i Daugovys baseina ekosistemai, Latvejā atkon atīs atpakaļ PSRS tehnokratejis rāgs.
Reperenduma organizatoru izsyuteitajā inpormacejā radzams, ka olkateiba īzadzeivuot iz liktina upis riekina puorjēmuse ari kanala bīdreibai dapulcynuotū bejušū Latvejis Republikys ministru prezidentu Māri Gaili, bejušū ekonomikys ministru Ati Sausnīti, eksprezidentu Gunti Ulmani, bejušū pinanšu ministru Uldi Osi, aktīri Rolandu Zagorski, Vaļsts Prezidenta Zatlera padūmnīku Vasiliju Meļņiku, uzjēmieju Gunāru Ķirsonu, kai ari vairuokus cytus zynomus cylvākus, tymā skaitā vysdažaiduokuos raudzis aperistus.
Dīmžāl, Latvejis Republikys Satiksmis ministreja, taipat kai vairuokys pošvaļdeibys navys nūraida ciniskū projektu, bet īzalaiž sarunuos ar grupiejuma vodūnim, iz vaļsts riekina taisūt dažaidys „sarunu” i „dorba” grupys.
Tys ir tragikomiski, i tei reizē ir smīšanuos par Breiveibu, kū tauta dabuoja atpakaļ reizē ar Trešu atmūdu, vysupyrms, nū izneiceibys atbreivuodama Augšdaugovu.
Jākabpiļs Latvīšu bīdreiba i apakšā pazarakstejušīs aicynoj Jius reikuotīs, kab nazaturpynuotūs vaļsts i pošvaļdeibu sankcionātu sadarbeibu ar Baltejis-Malnuos jiurys kanala gaisagruobšlim. Mēs prosam, kab liktina upis krūpļuošonys prīkšlykumi nikod natyktu apsprīsti īstuodēs, kurys uztur nūdūkļu moksuotuoji.
Mēs sokam: „Rūkys nūst nū Daugovys!”
Uzsaukuma autors – Jākabpils Latvīšu bīdreiba. Atspaidu dūd Vidis Aizsardzeibys klubs.
Ite nūvalkamys parokstu lopys:
Bīdreibys „Latgolys tradicionaluos kulturys centra „Latgaļu sāta”” aicynuojums:
Lyudzu, vuocit parokstus sovūs mīstūs, pogostūs i soluos – sorguosim i gluobsim Daugovu, na tikai Daugovys krostūs dzeivojūšūs latgaļus, jū volūdu i kulturu! Pazarakseišonuos ilgs da 31.majam, kod atvārtuo viestule i savuoktī paroksti tiks aizsyuteiti „tautys kolpim”.
Savuoktūs parakstus syutit iz adresi:
Vecpilsētas laukums 3
Jēkabpils Tautas nams
Jēkabpils
LV-5201
