Voi „100 gramu kulturā” ir vieļi patīsa latgaļu kulturys izpratne?

Cik žāļ, cik žāļ, ka vieļ naasom saprotušs tuo, ka eista dzymtuos volūdys vierteiba saprūtama ir viņ tīm latgaļīm, kas dzeivoj latgaliskā vidē i kuri apjauš – da dvieselis dziļuokajīm olūtīm apjauš sovys latgaļu volūdys izmierdeišonys politiku, kuru eistynoj myusu latviskuo, taitod i latgaliskuo vaļsts ar pošu, nuj, pošu latgalīšu pretlatgaliskū darbeibu; kod teik systs pi kryušu ar kulakīm, ka jī ir latgalīši, a vyss teik darāts ūtraiži, nu, kai nazkod i nazkur saceju i raksteju, ka tī nav latgaļi, kas nadzeivoj latgaliskā vidē i dīņdīnā narunoj latgaliski, tī ir latgalīšu izceļsmis latvīši, kas ņikod „naatņirgs zūbu” pret sovu maizis devieju.

Tai 12. pebraļa „100. gr. kulturys” raidejumā izadareja Laima Muktupāvela i Jaņīna Kursīte. As apstulbu klauseidamīs, redzeju kai Jurs Viļums zaudeja volūdu, dzierdeidams obeju kundžu nūdeveigū vuovuļuošonu … Patīsa cīņa Jureišam, kurs atroda spākus smaideit i dabeigūs pasaceit truopeigu dūmu par atškireiguo izpratni. Paļdīs Juri!

Cik to iļgi mes jauksim volūdu ar dialektu? Voi ir kod vīņs akademiskys pietejums par latgaļu volūdu, kurā drukavoj jov vairuokus symtus godu gruomotys i presi? Kuo jaucit Latviešu valodas Augsžemnieku dialekta latgalisko izlokšnu (runys volūdu) ar latgaļu volūdu? Cik iļgi myusus – latgaliski rokstūšūs literatus Latgolā i cytur taiseisit par durakīm? Nazynu, patīsi nazynu kū vieļ lai soka, kod patīseibai spļaun acīs, a soka, ka bučoj, kod syt ar kulaku pakryutē, a soka, ka gluosta, kod pagryuž slapynā dūbē, a soka, ka padūd rūku, lai paleidzeitu nu tuos kuopt uorā … As lepojūs, patīsi lepojūs ar tuom myusu latgaļu volūdneicuom, kurys napakreit nu īnaidiskys aizrunuošonus , kū dora munys muotis i muna tāva volūdys i kulturys nadapraškys.