Zynuotniska diskuseja par latgalīšu volūdu “LATGALES LATVIEŠU VALODA LATVIJAS VALODAS POLITIKAS KONTEKSTĀ”
Piec 2009. goda 15.–17. oktobrī Rēzeknē nūtykušuos 2. storptautiskuos latgalistikys konferencis i juos laikā pījimtuos rezolucejis, kas „atzeist, ka latgalīšu volūda atbylst regionaluos volūdys statusam i aicynoj izstruoduot pasuokumu programu ituo statusa apstyprynuošonai”, ir palics aktuals vaicuojums par Latgolā runuotuos latvīšu (voi latgalīšu) volūdys kai nūvoda identitatis pamatu, par juo saglobuošonu, atteisteibu i statusu, deļtuo Latvejis Universitatis Latvīšu volūdys institūts ituo goda 8. decembrī reikoj diskuseju par Latgolys latvīšu volūdu saisteibā ar Latvejis sociolingvistiskū situaceju i volūdys politikys pamatnūstuodnem.
Viesturiski niulenejuos Latgolys latvīši gondreiž 300 godu atsaroda cytys vaļsts teritorejā i beja škierti nu puorejuos latvīšu etniskuos teritorejis. 1917. goda 26.–27. aprelī Rēzeknē 1. Latgolys kongresā (vaira kai godu pyrms Latvejis vaļsts proklameišonys) tyka pījimts lāmums par Latgolys atsadaleišonu nu Vitebskys gubernis i apsavīnuošonu ar Kūrzemis i Vydzemis latvīšim.
Nūškierteibys laikā Latgolā ir izaveiduojuse sovpateiga kultura, tymā skaitā i sova rokstu tradiceja, kas baļsteita iz augšzemnīku dialekta latgaliskūs izlūkšņu i pastuov vaira kai 250 godu. Myusu dīnuos jei teik saukta par latgalīšu rokstu volūdu.
Cauri puorpūļuošonys i puorkrīvuošonys godu symtim latgaliski drukuotais vuords ir paleidziejs saglobuot nūvoda latgaliski latvyskū identitati. Latgalīšu rokstu volūdā saraksteits i izdūts ari nūzeimeigs literarais montuojums, kas ir vysys latvīšu tautys kulturviesturiskuo montuojuma daļa.
Dīvamžāļ leidz pat myusu dīnom Latgolā runuotuos latvīšu voi latgalīšu volūdys ka Latgolys latvyskuos ideņtitatis pamata lūma nav pīnuoceigi nūvārtāta. “Vaļsts volūdys lykuma” (1999) 3.(4) pants nūsoka: “Vaļsts nūdrūšynoj latgalīšu rokstu volūdys kai viesturiska latvīšu volūdys paveida saglobuošonu, aizsardzeibu un atteisteibu”.
Kab zynuotniski izvārtātu Latgolā runuotuos latvīšu volūdys i latgalīšu rokstu volūdys attīksmis, Latvejis Universitatis Latvīšu volūdys instituts ituo goda 8. decembrī reikoj diskuseju.
Diskusejā pīsadaleis volūdnīki i volūdys politikys specialisti: IZM vaļsts volūdys politikys nūdalis vadeituoja Zaiga Sneibe, LU Latvīšu volūdys instituta direktore Dr. habil. philol. Ilga Jansone, Vaļsts volūdys centra direktors Dr. habil. med. Māris Balteņš, Rēzeknis augstškolys asoc. prof. Dr. philol. Ilga Šuplinska, LU profesore Dr. habil. philol. Ina Druvīte, LU profesore Dr. habil. philol. Janina Kurseite, LU asoc. profesore Dr. philol. Lideja Leikuma, LU Latvīšu volūdys instituta vod. pietneica Dr. philol. Anna Stafecka.
Diskusija nūtiks ituo goda 8. decembrī vīnā stuņdē (plkst. 13.00) Latvejis Zynuotņu akademejā, Akademejis lauk. 1, 3. stuova zālē. Paradzātys i atbiļdis iz vaicuojumu i debatis. Īpraseiti vysi interesenti!
Informaceju sagatavuojuse: LU Latvīšu volūdys instituta vodūšuo pietneica i Zynuotniskuos padūmis prīkšsādātuoja Dr. philol. Anna Stafecka.