Kuozuos
![](https://lpr.gov.lv/wp-content/uploads/2009/bariss/1974.jpg)
Sēdēja gosti,
Stuomači kambarī patakys loka.
Jaunivis muoseņa tuolajā styurī
Biedeiga kuozu dzīsmeņu suoka…
Tuo gola kristāvs
Izsyta spundi,
Salieja čipeitī mīzeiti soldu.
Tukšuojuos struceits jauneču prīcai,
Dzīsmes skandynūt, eimūt ap goldu.
Aizdeve tautuos
Prīceņu munu,
Dzīduoja, rauduoja, pogostu matūt…
Čyguoni jūkuojuos, zeilieja laimi,
Vasalym kiulim, kai rudzu stotūs.
Duovonas, pučis,
Apdzīduošona…
Jaunivis zagli i mičuošona.
Prīki i osorys kūpā juka,
Vysai dzeivei lai byutu gona!
Karūtem sytūt
Saimineicys
Sovai dalei ap goldu guoja –
Slavejūt, smuodejūt, jūkus dzanūt,
Cikom pīkusa, mīrā stuoja.
Ituos kuozas nabej nīks,
Dzīdam olu īdzerūt!
Izgarela perednīks
Vašim kašu vuorejūt!
Jau mani vad,
Jau mani vad –
Jau muna jauneiba
Kiuliņus mat!