Latgalisku pasuokumu maratons
Kai kotra mieneša pādejā pīktdinē, ari šudiņ laikroksts “Latgales Laiks” izdūd pīlykumu latgalīšu volūdā “Latgalīšu Gazeta”. Itymā reizē roksts par desmit dīnu laikā sareikuotajim desmit latgaliskajim pasuokumim Reigā, Dagdys nūvodā, Kuorsovā, Viļakys nūvodā i Daugpilī.10. septembrī vīsneicys „Latgola” 10. stuovā nūtyka muzykals pasuokums „Taiseits Latgolā / Made in Latgola” ar latgalīšu grupu „Dabasu Durovys” i „Likteneigais pagrīzīņs iz Vainovu”, kai ari Da Gunchi nu grupys „Bez PVN” daleibu. Publikai tyka prezentāti ari diveji jauni videoklipi: „Jei” (Bez PVN) i „Muoksleigī kāmeiši” („Dabasu Durovys”) – niu obejus video varit apsavērt ari portalā LaKuGa.LV. Nu ostoņu stunžu vokora leidz vālai naktei Daugpiļs augstuokajā punktā vaļdeja latgalisks gors i atmosfera. Paļdis vīsneicai „Latgola” (Rutai Sarkanei personeigi), Arņam Slobožaninam i Latgolys Studentu centram.
Piec puora dīnu Dagdys nūvoda Šķaunē nūtyka latgalīšu dzejneicys Marijis Andžānis 100 godu jubilejis atceris breids (vairuok par itū pasuokumu skaitejot laikroksta „Latgals Laiks” 18. septembra numerā).
Nu 13. leidz 18. datumam latgalīši uzadorbova pa vaļsts golvys piļsātu, tai svātdiņ, 13. septembrī, Reigā visi latgalīši tyka saukti īt iz dīvkolpuojumu Sv. Marijis Magdalenys bazneicā. Ari cytuos svātdīnēs Reigys katuoli teik laipnai aicynuoti iz Sv. Misi latgalīšu volūdā desmit stuņdēs nu reita!
14. septembrī Latgolys Studentu centrs jau ūtrū rudini reikuoja vokora stygu – kokursus latgalīšu jaunīšim. Itymā reizē pasuokuma devize beja „Ej šī! Iz munom trepem…!” Par ituo pasuokuma tradiceju klivuse i myusejuo nūvodnīka Raiņa pīminekļa Reigys Esplanadē īsaisteišona.
15. septembrī nūtyka Dzejis dīnu muzykalais pasuokums „Tehnodzeja” Reigys Tehniskajā universitatē. Caturtdiņ, 17. septembrī, tymā pat Reigā, kopejneicā „Leningrad” nūtyka džezeigs koncerts grupys „Dabasu Durovys” izpiļdejumā, kai ari videoklipa „Muoksleigī kāmeiši” prezentaceja Reigys publikai. Dīnu vāluok klubā „Depo” nūtyka kuortejais latgalīšu muzykys pasuokums ar devizi „Taiseits Latgolā / Made in Latgolā”. Pīsadaleja meitiņu sasksafonistu grupa ar nūsaukumu „Zaļuo Zeme” (nu Skrīveru apleicīnis) – jūs izpiļdejumā izskanēja pādejuo laika popularūs latgalīšu dzīšmu popurejs, kas īsiļdeja publiku i deve spāku ļustēt leidz vālai naktei. Vēļ pasuokumā pīsadaleja gosti nu Jelgovys ar vīnu dzīsmi latgaliski, kai ari vairuokys grupys nu pošys Latgolys: „Dabasu Durovys”, „D-Light”, „Out of Horizon”, „Restauratori”, tok vysa vairuok publiku sakurynova skaļuokī Latgolys muzykanti – „Green Novice”.
Ite pat Latgolā 18. i 19. septembrī grupa „Borowa Mc” ceļova koncertturnejā pa Dagdu i Kuorsovu, tok leluokais nedelis pasuokums tyka sareikuots sastdīņ Viļakys nūvoda Upeitē. Jau ostoitū godu piec kuortys nūtyka vacuokais latgalīšu meilys aiļu i dzīšmu festivals „Upītes Uobeļduorzs”.
Desmit latgaliski pasuokumi tik desmit dīnu laikā! Ruodīs, ka trokums nazkaids, tok, nu ūtrys pusis, taišni tai pasuokumus i juoreikoj iz prīšku – videji pa vīnam latgaliskam kotru dīnu!
