Meilys aiļu i dzīšmu festivals „Upītes Uobeļduorzs”
Leluokais paguojušuos nedelis pasuokums tyka sareikuots sastdīņ Viļakys nūvoda Upeitē. Jau ostoitū godu piec kuortys nūtyka vacuokais latgalīšu meilys aiļu i dzīšmu festivals „Upītes Uobeļduorzs”.
Pīsadaleja literati: Ontons Slišāns, Zinaida Logina, Jureits, Mārīte Slišāne, Raibīs Suņs, Santa Matisāne, Karonhisake i Ireta Čekse, a pasuokuma golvonī dalinīki vysleidz beja muzykanti kuplā skaitā: „Karburators”(kai ļauds stuosta – vacuokuo latgalīšu rokgrupa), „Iļža”, jaunīšu kapella „Biteites”, ansamblis „Rekovas Dzintars”, Laura, dzīsminīks Vinsents Kūkuojs, grupa „Rudiņs Steigys”, „Likteneigais pagrīzīņs iz Vainovu”, „Bez PVN”, „Dabasu Durovys”, „Medņevas Puikas”, „Out of Horizon”, Aija Eriņa i „Green Novice”. Pauokuma dalinīki i aktivuokī gosti sajēme atstoruotuojus ar festivala simboliku.
Kai “Latgalīšu Kulturys Gazetai” pastuosteja pasuokuma organizators Andris Slišāns, jau ir nūlykts datums cyta goda festivalam – jis byus 18. septembrī, varit atzeimēt pi seve kalendarā. A itymā godā ass bejs tik lobs pasuokums kai vēļ nikod – ļauds viereigai klausējēs dzejnīkus i muzykantu spieleišona nūtyka breineigi syltā atmosferā. Vēļ tik grybātūs drusku vaira cylvāku. Tū i nūvielēsim cytugod sasnīgt!
Ite nalels video nu pasuokuma (“Dabasu Durovys”):
