ailis / Baiba Zveigule

***
Latgalīts ir būrs, latgalīts ir muokslinīks.
Jis kotru dīnu dora vaira, kuo vyspuor var izdariet.
Jam vysu juopaspiej div reizis mudruok
I div raizis lobuok, kab jū pamaneitu.

Latgalīšam jam nūst da baidzamuo…
A jis tik nūrej sovu suopi, Dī’s atmoksuos…
I obom rūkom i sirdi dūd, lai pītyktu vysim
Aporta teiruma smuorda, bazneicys zvona skanis,
Dzīsmys dzeipara villainys boltys i Dīva vuorda.

Latgalīšam juobyut stypram, i jis ir.
Varbyut par jū kuodraiz raksteis i runuos,
Bet es zynu, ka vysduorguokais vimpeļs jam ir
Laimeigi latgaliska Latgola.

Naapvuokuotuo

Klusā sātu pogolmā
Zam ļaužu acim
Jei siedej iz vaca kūka sūleņa
Tikū pīveiluse draugu
Jyutās vaineiga tikai par tū
Ka šūreit naizlikuse capuri
Tuods oss viejš pyušūt
Īkšā naīšūt nazynūt vaira
Juo sirds durovu kodu
Dreiži mekleišūt cytu
Tuodu kuram durovys taisūtīs
Pa vacam

Kur esi?

Iļgi tu mekleisi mani gar akmiņu patmaraukom,
Trotuarim, alejom, ubogu pastīptom rūkom,
Pa vydu symtu kuoju nūmeitom cereibom, prīkim.
Tramvajūs viļteigi nūzogtim naudys mokim.
Iļgi tu mekleisi mani gūda, dvieseļu tiergā,
Kur vyscauri nateireiba i šmaukšona,
Mudri nūslauceitys pādejuos kauna druponys
Ni īcīteibys, ni naida, vin vīnaldzeiba
Dziļa i palāka kuo Ūkstinis pūrs,
Tuods vaicojums i tuoda atsaceišona…
Nameklej mani tī, kur manis navajag.

***
Veļūt sovys vacuos dūmys nu kolna
Giunu jaunu, skaistu pasauļa mīļuošonu
Pasauļs nav lobs, nā ni pa vysam…
Bet juomīļoj ari švokais,
Lai tod, kod jis atītu da maņa, palyktu lobs
Vysi, kurus mīļoj, raizi palīk lobi…

***
Otkon aiz sātys pakšim
Riezeknī īt kugis.
Veļ, ragaņs, taurei,
Kuo Titaniks iz sleikšonu.
Varbyut jam ite ir pītura
Pit-stops, randeņš, sāta…
Voi jis tik grib atsapyust,
Tān tok vysi mudri pīkiust.
Jam kuojuos vacys kedys,
I kedom nateiri šnūrki,
A es guļu gultā – otkon mūrgi!

p.s. lusteigu leiguošonu!