Grupys „Dabasu Durovys” stuosts par vosoru i breiveibu
2009.gods 29.majā latgalīšu rokgrupa „Dabasu Durovys” pīduovoj jaunu dzīsmu „Uz Andrupeni” („Iz Ondrupini”). Jaunuo dzīsma byus dzierdama gon regionalajuos, gon Vyslatvejis radejuos. A jau 30.majā grupa brauc iz Lītovu, kur jims daleibu storptautiskā jaunīšu muzykys grupu projektā.
Jaunuo dzīsma stuosta par vosoru i par breiveibu. Tys ir stuosts ari par Ondrupini – mīstu Kruoslovys rajonā, kur pirmuos sātys izcaltys pyrms 99 godim. Grupa „Dabasu Durovys” itū vītu par dzīsmis tālu izavēlēja najauši, koč gon ar tū ir saisteitys ari grupys dalinīku atminis.Dzīsmis teksta i muzykys autors ir Arns Slobožanins. Īrokstā daleibu jēme vysi grupys „Dabasu Durovys” niulejī dalinīki – Arns Slobožanins (gitara), Egils Kulmanis (saksofons, bolss), Juoņs Veliks (bungys), Edgars Kluss (gitara), Mihails Šaiters (basgitara). Dzīsma pieejama nūsaklauseišonai škārsteiklā: www.draugiem.lv/dabasudurovys.
Nu 30.maja da 8.juņam „Dabasu Durovys” jims daleibu festivālā „Tevo Gitara” Lītovā. Itūgod festivāls nūteik storptautiska jaunīšu projekta laika, i tī pīsadola muzykanti i grupys nu Latvejis, Lītovys, Turcejis, Itālejis, Pūlejis, Portugalis. Lai jimtu daleibu projektā, kotra grupa īraksteja kaververseju kuodai lītovīšu dzīsmai. „Dabasu Durovys” ir īrakstejuši V.Kernagis dzīsmi „Ar tu lauki” (latgaliski – voi tu gaidi), kura dreiži skanēs ari Lītovys radejuos.
Grupa „Dabasu Durovys” izveiduota 2006.gods suokuos Daugavpilī. Pa itū laiku grupa ir jāmus daleibu daudzūs jaunūs muzykantu grupu koncertus, festivalūs i konkursūs Latvejā i Lītovā. Leluokīs grupys sasnāgums – 2008.gods rudinī sadarbeibā ar „Latgolys Producentu Grupu” izdūts pyrmais grupys muzykys albums „Ļepetņīks”.
