Vabalē puļcējuos Latgalīšu Etnokulturys centra bīdri
2009.gods 18.aprelī Skryndu dzymtys muzejā Vabalē puļcējuos bīdreibys „Latgalīšu Etnokulturys centrs” bīdri. Sanuoksmis laikā bīdreibys vaļde atsaskaiteja par padareitū goda laikā, bīdri prezentēja sovus savuoktūs etnografiskūs materialus, a nūslāgumā nūtyka vaļdis vieliešonys.Bīdreibys „Latgalīšu Etnokulturys centrs” leluokuo i nūzeimeiguokuo aktivitate pārn ir projekta „Etniskās mūzikas skaņu laboratorija” realiziešona ar Eiropys Savīneibys programmys „LEADER+” atbolstu. Projekta rezuļtatā bīdreibys lītuošonā ir dators i skaņu aparatura īrokstu veikšonai , folklorys materialu digitaliziešonai i uzglobuošonai.
Kūpsapuļcis laikā Astrīda Dambīte nu Vuorkovys prezentēja tikkū izdūtū Janīnys Vilmanis ūtrū gruomoutu „Vārkavas novada mutvārdu daiļrades pūrs”. Sovulaik Anita Auzāne īpazeistynova ar sovys dzymtys sīvīšu darynuotajim rūkdorbim, atkluojūt rokstu i izmontuotūs tehniku daudzveideibu.
Sanuoksmis dalinīkus pateikami puorsteidze Skryndu dzymtys muzeja darbinīku sagatavuotuos pušdīnis, kod varēja paēst Vabalis pusis tradicionalū iedīni – komys.
Kūpsapuļce nūsaslēdze ar bīdreibys vaļdis vieliešonom. Nuokušūs divus godus „Latgalīšu Etnokulturys centra” vaļdē dorbuosīs Artūrs Uškāns, Inta Uškāne i Anita Auzāne.
Piec sanuoksmis bīdreibys bīdri apmeklēja voi pīsadaleja Tautys muzykantu saītā, kas pulcynova 17 dažaidus muzykantus nu Vabalis, Saļnovys, Kūknesis, Atašīnis, Pušmucovys, Naujenis, Daugovpiļa, Jākubpiļa i Zarasim Lītovā.
