Latgolys Radejis zinis (31.03.2009.)
Šudiņ Preiļu Navalstiskūs organizaceju centrā nūteik inpormativa saīsme par Latgolys kuļturys programmys projektu dasacejumu konkursu, kū izsludynuojuse Latgolys regiona atteisteibys agentura. Konkursa aizdavums ir 2009. godā snēgt pinansialu atspaidu svareigim kuļturys projektim, kas veicynoj Latgolys kultūrvidis, vierteibu i tradiceju atteisteibu.
Da 17. apreļam Leivuonu nūvoda dūme izsludynuojuse kandidatu dasaceišonu Gūda pylsūņa titula daškieršonai, inpormej Leivuonu nūvoda dūmis sabīdriskūs attīceibu specialiste Indra Artemjeva. Kandidatus Gūda pylsūņa titulam var īsaceit Leivuonu nūvoda deputati, dūmis komitejis i komisejis, Leivuonu nūvodā registrātuos juridiskuos personys (NVO, komersanti i cyti), vaļts i pošvaļdeibys institucejis, kai ari dzeivuotuoji, kurūs dzeivis vītys deklarātys Leivuonu nūvodā i kurī parakstejuši padavumu.