Loba ūža, švaka dūša
Vysaidi cylvāki pasaulī dzeivoj. Vīni gryb teireibu i sakūpteibu. Ūtrī lobuok pa māslīm raušuos. A vieļ cyti – ņi pa šam, a ņi pa tam, jo jīm dūša napīļaun byut kunguskejā dzeivē i dūša natur – pa syudīm broduot.
Nuj, nuj, vysaidi cylvāki pasaulī dzeivoj, tai pat kai vysaidys varys vaļdeibys krāslūs sasasāst i vysaidi ļaužu dzeivi grūza – kai bleiņus iz korstuos ponnys.
Pazynu vīna pogosta veci. Nu, napatyka jam tys omots. Jys tū nese kai zyrgs komotu. Da pušdīnu vieļ beja kai beja ar tū atsarosšonu pogosta vadeibā, a jov, paieds pušdīnis, stuņdinīkā viņ vieries, kab uotruok da sātai pi sīvys brunču. A voldūšuo parteja jū vys tureja i tureja pi varys, tai itaids snaužka pi varys beja pa pruotam vasalus 15 godus.
A ira i ūtraižuok. Kod par myusu bejūšū ministru prezidentu runojūt. Nu, patyka jam byut pi varys, patyka vysu pastuodeit pa sovam, a varys partejuom tys naguoja pi sirds. Juom vādzeja sovaižuok. I, lai kai speirovuos vaļdeibys golva, omots beja juopamat.
Oi, kai vairums ļaužu, tai pat kai vairums parteju, saūž tū vīteni, nu kureiņs vysaidi lobumi atlāc … Saūž i tai leipst i leipst pi tīm krāslīm, pi tīm sūlīm, pi tuom spovedneicuom, pi tuom bankuom i pi karūgu kuotīm, i pi bolsuošonys puļts …
Viņ vīna bāda – vairumam pruotā i kryutīs īsasādusēs švaka dūša. Jī nikai navar pacīst tuos smokys i tūs vaimaņu, kaidys ceļuos nu ļaužu vairuma … i dieļ tuo gribīs uotruok pīlikt sev i sovejīm pylnys kuldys i – laistīs „lopuos”, voi, palīkūt omotūs – nadalaist sovā tyvumā dūšys maituotojus.
Kai Baļtinovys Jermaku Jezups soka: „Švaki taidam, kod ūža ir loba, a dūša ir švaka”.
Nuj, nuj. Pavysam švaki taidīm dzeivuot; i pi golda, i klāvā, i piertē, da i vaļdeibys nomūs toža.
A Rekovys Plikšatu Jezups tai soka: „ Kura čorta lein tī, kur vieļuok viemīņs paraun!”
Nuj, nuj. Kura čorta, nasaprūtu, kura čorta leist pi varys, ka dūša natur – atsatureit nu sovu kuldu pībuozšonys i dūša natur – pruostuos tautys saprasšonys …
Oi, oi, kai daudzejīm, ka na vysīm, ir loba ūža, lai sajustu naudys sili i syltu vīteni zam lyluo jumta! Oi, oi, kai daudzejīm, lai nasacātu ka vysīm, kas salein kungu krāslūs, ir švaka dūša, kod prostuo tauta gryb toža dzeivuot lobuok!
Petru Pīters
