PALĀDA (fabula)

Piec boguoteigom medeibom
I agrom suotnom brūkastem
Palādai bej’ muoga smoga
Un dreiž jau mīgs jai dasazoga;
Tyma pat’ līpā, maļteite kur beja,
Te, meža molā,
Jei ni nu vīna nasabejuos.

Dreiž roduos mīra traucātuoji –
Mozi putni – dzīduotuoji.

Tik itū reizi, na ar dzīšmom
Bet ar gvaltu, kara brīsmom.
Jūs spuorni šveikst,
I bolsi peikst,
A palādai vairs nav kur leist, –
Saule žylbnoj jai acis,
Nu vysom pusem kara tracis.

Kotra radeibeņa moza
Morali jai losa:

– Kai tev, zaglei kauna nav, patīši?
Cik iļgi laupeiti tiks meža muojūkleiši?
Pelis teirumā – ir tova daļa,
Bet na myusu cuoļu gaļa! –

Aug leluoks čeipstātuoju malnais rojs
Kai pikets. Kas tū izdumuojs?

Gaida palāda – kod vokors nuoks,
Mozī nakainis tod rimtīs suoks.
Jei dīnā okla, zynoms tys,
I pacīst dasaīt šuos klopotys.

– Kas zyn’, kur bizūknis tys dzmtais,
Pat’ tagad, dīnā, gondreiž tymsais? –
Jei līpā dūmoj, planus kaļ:
Kai itū piketu jīm sarībt atpakaļ?
I soka sev:
– Es naktī paruodeišu sovu varu
Ar jaunu laupeišonu. Na ar karu. –

Nakts zagļus tīsā saukt vys navaram nikai,
Ni golu dareit ‘ānu ekonomikai’.