Latgalīšu muzykys grupys i autori protestej pret „Latgolys Radejis” tānejū pormatu

Leluokuo dale aktivūs latgalīšu muzykantu i dzīšmu autoru SIA „MG Latgolas bolss“ vierseibai i AKKA/LAA irā padavuši protestu, kas nūlīdz jūs dzīšmu atskaņuošonu „Latgolys Radejis” eterā.

Daudzejūs Latvejis viesteitivūs jau pasaruodeja zinis par pādejuo laika nūtikumim saisteibā ar „Latgolys radeju”. Juos idejiskuo darbeiba napylnu 3 gadu garumā beidzās ituo gods janvara 30 d., kod radejis leluma kapitala daļu apšuorbojomys puordūšanys rezultatā suoce skanēt krīvvolūdeiguo programa „Alisa+”. Mynātuo staņceja pyrma dorbovuos tikai Daugpiļs apleicinē.

Vysu itū laiku „Latgolys radejis” prekveņcejuos (Rēznē, Bolvūs, Jākubpilī i Daugpilī) skanēja programa (ari muzyka) krīvu volūdā, tikai cīši ratai kuru dzīsmi voi zinis puorraidūt pa baļtiskam / latgaliskam. Koč NRTP apstyprynuoto koņcepceja paradz maksimalai da 40% puorraideit cytuos volūduos, puorejū laiku pamatūt deļ latgalīšu i baļtīšu volūdu.

Da viestulis autoru daguojušys zinis, ka SIA „MG Latgolas bolss“ jaunī sovinīki, beistūtīs nu NRTP sankceju iz laiku irā sasprīduši puormeit pādejūs dīnu nalykumeigū pormatu. Suocūt ar pebraļa 9 d. jī planavoj raideit ari pa latgaliskam i baļtiskam vokora i nakts laikā, dīnu piļneibā pamatūt krīvu volūdai. Itaida radejis staņcejis koņcepceja latgalīšu muokslinīkim navā pījamama i idejiskai irā īskaitoma par piļneigai amoralu, kam juos pamatā irā zemiski biznesa pajiemīni i zamvieleišonu gaisūtne.

Partū, suocūt ar 2009 gods pebraļa 9 d., mes, zemļuok pīraksteitī muzykanti i autori, aizprosom SIA „MG Latgolas bolss” („Latgales radio“) vysuos prekveņcejuos izbeigt myusu dzīšmu atskaņuošunu i raideišonu iz nanūsaceita laika. Ka radejis vierseiba ituos praseibys napiļdeis, muzykanti i autori grīzsīs pret radejis staņceji ar AKKA/LAA starpnīceibu lykumā paradzātajā kuorteibā.

Arņs Slobožanins, grupys „Dabasu Durovys”, „Jann & Latgalians”, „Patipons”, „Kapļi”
Guņts Rasims, Kristaps Rasims, grupa „Bez PVN”
Jurs Vucāns, grupa „Likteneigais Pagrīzīns iz Vainovu”
Andris Baltacs, grupa „Baltie Lāči”
Normunds Līpeņš, grupa „Inga un Normunds”, „Non Divisi”
Alvs Bernāns, grupa „Green Novice”
Arturs Uškāns, grupa „Laimas Muzykanti”
Jurs Ostrovskais, grupa „Patrioti.LG”
Karlis Strubergs, grupa „Crust”
Jaroslavs Poļakovs, Guntra Kuzmina, grupa „Rudens Stīgas”
Grupa „New Buzz”
Grupa „Weron Martin”
Popgrupa „Knifs”
Laura Bycāne, grupa „Alverna”
Duets „Iļze i Gunta”
Gunars Indričāns, „Jis i Jī, Kam Nav Bolsa”
Didžejs „Mart INC”
Grupa „VM”
Popgrupa „Fakts”
Izpiļdeituojs „Trojs”
Grupa „Postmarka”
Lolita Greitāne, popgrupa „Cielaviņa”
Gunars Igauņs, Ilmars Dreļs, grupa „Dziga”
Biruta Ūzuleņa, grupa „Patina”
Anita Bierzeņa, grupa „Latgales Dāmu Pops”
Andris Ereņš, Aija Ereņa, grupa „Drycānu Dominante”
Vincents Kūkojs
Dace Tikovskuo, grupa „Ilža“
Julejs Stikuts, kapela „Julejs”
Biruta Ozoliņa, grupa „Patina”
Ingars Gusāns, Aigars Runčis, grupa „Borowa Mc”

Kontaktinpormaceja:
Guņts Rasims
Latgolys Producentu Grupa
+371 29492864
producenti@inbox.lv