Biblioteka i demokrateja
Laikam vysys revolucejis i laiku mainis pavoda biblioteku grauteni i dadzynuošona. Informaceja ir juoiznycynoj voi ari juopuorroksta.
Bibliotekys ir vacuo laika informacejis gluobuotive – īt jauns laiks, vysu vacū juoaizmiež viesturis mieslīnī. Arī tū, kas esi bejs tu pats, kas beja tovi tāvs ar muoti i kam ticēja tova baba.
Najaušom revolucejom bez mierķa i idejis, paradzamu idealu i ceņtīņu rakstureigi najauši grauteni. Pi kurys sātys stuovēja policejis mašynu kēde, tei sāta ari tyka apsvaideita ar akminim i pudelem. Itūreiz – Nacionaluos bibliotekys kuorms Jākuba īlā.
Voi nu janvara namīra byus kaida muoceiba – tautai, cylvākam, varai?
Voi itys byus īmeslis īsaklauseit ūtrā – cylvākā i sabīdreibā, varā i dareituojā?
Voi ari īmeslis apklusynuot ūtru – varai apspīst demokrateju, a cylvākam nūraksteit varu?
Ir vārts īguoduot Boltkrīvejis pīredzi ar opoziceju.
Ari tī pyrmajuos demonstracejuos i mīteņūs miliceja beja maiga i saceja – patīseibā mes esim ar tautu. Tikai kuorteiba mums taida, dorbs taids.
Niu vyss ir kuorteibā, vysim ir dorbs i aļdzeņa. Sātmali ir izpļauti, ražoj traktorus i dasys, bumbu patvertnis ir atjaunuotys, televizorā ruoda šovus krīvyski, vysys budonkys ceļa moluos nūkruosuotys. Nav būžu i čyusluoju. Nav ari boltkrīvu volūdys. Vyss kuorteibā.
Tikai miliceja vaira nav vacuo. Sajem lobu olgu i dora, kū līk. I par džinsu revoluceju līcynoj tikai zylys būrteitis, kas kircinej dasītys pi īlu stulpu.
Lai Tev i maņ naaizamierst, kas mes bejom ogruok, kas mes asam niu i kuo mums vajag, kab mes byutu ari iz prīšku.