Latgalīšu dzeja. Bez PVN

Trešdiņ, 21. janvarī, 16 stuņdēs Latvejis Nacionaluos bibliotekys Jaunuokuos periodikys skaiteitovā Kr. Barona īlā 14 (1. stuovā) nūtiks myusdīnu latgalīšu dzejis antologejis „Susātivs” prezentaceja „Dzeja. Bez PVN”. Ar literarom i muzikalom performancem pīsadaleis latgalīšu dzejnīki i muzykanti, pīvīnuotuos vierteibys nūdūkļa (PVN) vītā ekonomiskuos krizis i janvara namīra laikā dūdūt +21 % dzeivisprīceiga latgaliskuma i latgaliskys dzeivisprīcys.
Antologejis „Susātivs” prezentacejā pīsadaleis latgalīšu dzejnīki Anna Rancāne, Leiga Rundāne, Emileja Kalvāne, Ilze Sperga, Raibīs Suņs, Ireta Čekse i cyti. Latgalīšu muzyku akustiski spēlēs myusdīnu latgalīšu poproka grupa „Bez PVN” nu Kuorsovys.

„Latgaliskums ir pīvīnuotuo vierteiba. Pīvīnuotuo vierteiba ir ari spieja dzymdynuot, tymā skaitā – nūviertēt cytu dzymdynuotū i dzymstūšū. Deļtuo itūreiz nu gruomotys skaiteituoju i prezentacejis daleibnīku nateik gaidīts PVN, a spieja radeit i dūt PV,” stuosta antologejis redaktore Ilze Sperga.
Kai atzeist gruomotys sastateituoja, Rēzeknis Augstškolys Filologejis katedrys docente Ilga Šuplinska, gruomota ir bejuse īcarāta jau seņ, tok izdūta tik niu, kod sasatyka vysi faktori – finansialais atbolsts, autoru i sastateituoju iniciativa: „Var runuot par tū, ka itūšaļt ir palykuse aktivuoka studejūšuo Latgolys jaunuotne, ir sovys lobys tradicejis kulturys dzeivei. Kas naizadeve 20. godusymta 90. godu akademiskajim spākim i O. Seiksta, V. Lukaševiča suleigajam postmodernismam, varātu izadūt grupu „Borowys MC”, „Bez PVN” i c. muzykantim. Ka popularuo kultura atmūdynuos klauseituoju, tod revitalizēsīs ari cyti latgalīšu kulturys procesi.”

Grupa „Bez PVN” izaveiduojuse pyrms pīcu godu, izdavuse disku „Pyrms Vuorda…” i pīsadalejuse vairuokūs muzykalūs projektūs, tok leidz pat itam laikam nūsaukuma “Bez PVN” eistais zemteksts i atšifriejums teik apzynuoti globuots nu plašuokys publikys, partū ka tys var maiseit cytu jaunūs grupu atteisteibai vaļstī.
Dzejis antologejis „Susātivs” nūsaukumam izavālāts vacais vuords „susātivs” (āna), kas ir saisteits ar dziļuokuos asameibys mekliešonu sevī. Gruomotā publiceita 17 myusdīnuos rokstūšūs latgalīšu autoru dzeja: kai pīredziejušūs autoru Valentina Lukaševiča, Juoņa Ryučāna Annys Rancānis, Ingridys Tāraudys, Emilejis Kalvānis, Ontona Slišāna, tai ari jaunūs autoru Raibuo Suņa, Janys Skrivlis-Čeveris, Iretys Čeksis, Baibys Zveigulis i c. teksti.
Literārūs tekstus papyldynoj pīlykums – insceneita virtuala diskuseja par latgalīšu literaturu: kas jei ir i kaida ir juos vīta latvīšu i pasauļa literaturys kontekstā, kaidi ir juos autori i skaiteituoji i voi latgalīšu literaturai ir pastuoveišonys i atteisteibys īspiejis.

Gruomotys izdūšonu atbaļstejuši Vaļsts Kulturkapitala fonds i Latvejis Universitatis Latvīšu volūdys instituts.