Meikstūņa

MEIKSTŪŅA

* * *

Navaida maņ tik daudz odotu.
I mugora navaida tik plota.
Bet vīnu uobeleiti nu zam snīga
Es varu tev nūteikti atnest.
Pa iudinstrubu īleisšu tovā sātā.
Nikuo naapguosšu tukšajuos ustobuos.
Nūlikšu pa labi nu tovys gultys.
Pa ventilaceju aizliduošu izdzierds sūļus.

* * *

Gūvis staigoj pa upi.
Te navā dziļuok par vādaru.
Ka labi īsaskrīšu, puorliekšu puori.
Tikai gumejnīki paliks dubļūs.
Tikai kuorkli nanūgrīzti stabulēs.
Ka labi īsaskrīšu, puorliekšu atpakaļ.
Zynu, ka akmiņu te navā.
Navā i pludmalis smiļkšu.
Ka labi īliekšu, byus da koklam.

* * *

Piec katletu cepšonys palykušī tauki.
Skujis sakrytušys nu egleitis zorim.
Vosorā pīmiņu naktī pārkiuni.

Suokt rauduot ni nu kuo cīši gryušai.
Kūku lopys zam kuojom klusi čeikst.

Padadzynoju sveceiti, tod aizdzeru iudini.

Daža leits tū nadreikst.

* * *

Es kod puorpeļdieju
Puori jyurai,
Maņ laiva
Nabeja vairs vajadzeiga.
Varieju jū aizmierst,
A varieju i sadadzynuot.
Bet napaseņ es
Vīnam jū paduovynuoju.
Taidam, kurs napadūmuos
Ka es jam
Laivu paduovynuoju.
Kurs suokumā nasaprass,
Ka i es
Sovu ceļu īsuoku
Nu ituos vītys.

* * *

Iz cīta matraceiša guļ muna geiša.
Gaida, kod es atīšu ar peicku.
Valnus izdzonuošu nu juos paguļtis.
A es – storp Rēzekni i Reigu.
Bet atrūnu minotu storp sekundem.
Pļakš! Pļakš! Maitys pa styurim.
Saceļu apakli, aiztaisu durovys.
Vari nūsamozguot nu soltaim svīdrim.

* * *

Ka sāta ir pamasta

Lobuok lai kaids
Jū nūdadzynoj.

Es asmu tei prīde
Kas aug aiz pakša.

Voi kūku pympuri nazyna

Ka atīs rudiņs?

Ka manī īspers zibiņs –
Salausšu pus jumta.

Cārmyuška striptizu taisa,

I otkon es itū verūs.
Ar lūgu styklym tikai

Dreikst grīzt venys.

* * *

Muni ceiruli jau atliduoja.

* * *

Tīm, kuri nalosa dzeju,
Eistineibā es rokstu.
Es – leits Jaungoda naktī.
Rokstu, rokstu, i beistūs
Nu sova naspāka.
Beistūs par jiusim,
Ka jius nūsaļsit,
Koč ari zam sagom.
Beistūs nu gostim,
Kuri var atbraukt da manim.
Īraudzēs vysus itūs papeirus
Salyktus pa kastem.
Tīm, kuri nalosa dzeju,
Eistineibā es rokstu.

* * *

Ar toli apsystys sīnys
Sakorst augusta saulē.

Vystys grūza dybynus.

Saimineica gluosta gaili.

Izdzan nu garažys mašynu.

Aizbrauc piec maizis.

Apleik pylns ar pučem.
Ustobā tukšys vāzis.

* * *

Otkon byus juoguļ iz greidys.
Pošā liešuokajā kopejneicā reitiškys.

Verūs kopejis kruškā kai okā.
Gaidu olu kai zeme leitu.

Atnas meitine sorkonim byudim.
Suok īt atraugys, tys labi.

Izviele ir storp ūtru krušku
I risa salatim ar krabim.

Atnas meitine sorkonim byudim.

Pusdeveņūs nu reita piļsātys centrā
Runojom, kai dadzeivuot da pīcim.

* * *

Kotru reitu dzeru svežnis ūlys.

Tod izīmu iz balkona i dzīdu
Zamaškā salyktom mašynom.

Muna bolss ir divys gammys.

Nu Izika, kurs nūsasyta iz moča,
Da šyviejai, sābru Annai.

A vokorā es ražoju klusumu.

Pa nakti – četrys tonnys.

* * *

Pīteik ar veikalā
Nūpierktim uobelim.
Ilgi tūs mozgoju
Zam korsta iudiņa.
Nivīna sīvīte
Maņ rūkys navā
Tai sasiļdiejuse.