Susātivs mekliešona
Godskuortejais Andrejdīnai veļteitais pasuokums Rēzeknī itūgod tyka puorcalts nu īrostuo 30. novembra iz 16. decembri deļ tam, lai reizī varātu nūtikt ari myusdīnu latgalīšu dzejis antalogejis “Susātivs” satikšonys breids.Jau dasmytū godu Andrejdīnys pasuokums puļcej ailinīkus nu vysys Latgolys i, kai atzeimeja svātku golvonuo organizatore Ilga Šuplinska – daži nu sovā laikā dzeju skaitejušajim dalinīkim vairs nav starp myusim, deļ tam vysi kluot asūšī pīminieja jūs ar gūda breidi i vīnlaiceigi nūsavēre video fragmentus nu īprīškejim Andrejdīnu pasuokumim, kurymūs beja radzams i dzierdams, pīvadumam, Ontons Kūkuojs…
Lai pasuokums nakliutu puoruok nostaļgisks, prīškā tyka aicynuoti vysu īprīškejūs godu Andreijdīnu literarī uzvarietuoji: 2001. godā – Einars Dervinieks, 2002. g.- Svens Kuzmins, 2003. g. – Dace Skrauča, 2004. g. – Linda Ivanova, 2005. g. – Valentins Lukaševičs, 2006. g. – Iveta Ratinīka i Āris Kļaviņš, 2007. godā – Oskars Orlovs (Raibīs Suņs) i Evika Muižniece (Karonhisake). Kai vāluok izaruodeja – ari itymā godā pyrmū vītu īgive Karonhisake i Arturs Uškāns nu Daugovpiļs pusis. Apsveicam!
Vēļ leluoks dzejis autoru byrums saguoja iz myusdīnu latgalīšu dzejis antalogejis „Susātivs” prezentiešonu i kotrs nūskaiteja pa 1-3 sovim dorbim: Anna Rancāne, Jana Skrivļa-Čevere, Juoņs Ryučāns, Meldra Gailāne, Ontons Slišāns, Ilze Sperga, Valentins Lukaševičs, Karonhisake, Oskars Seiksts, Vita Viļuma, Raibīs Suņs, Ireta Čekse, Līvija Liepdruviete, Baiba Zveigule i Emilija Kalvāne. Vēļ divejis autoris – Ingrīda Tārauda, Līga Rundāne – iz itū pasuokumu navarie īsarast, koč ari jūs dorbi ir īkļauti antalogejā.
Juoatzeimej, ka gruomota saguoja dīzgon apjūmeiga – 335 puslopys, izdeviejs bīdreiba „Latgolys Studentu centrs” ar Vaļsts Kulturkapitala fonda i Latvejis Universitatis instituta „Letonika” atbolstu. Sastuodeituoja I. Šuplinska, redaktore i korektore – Ilze Sperga, maketietuojs i foto autors – Māris Justs.
Dūmojams ari itei gruomota vystyvuokajā laikā byus nūpierknama latgalīšu interneta veikalā: madeinlatgola.lv.
Starp cytu, V. Lukaševičs pasuokuma gaitā sūleja cytugod izdūt jaunu sovys dzejis kruojumu i varbyut kai reize nuokušajā Andrejdīnā tū jau pīduovuos ļaudim apsavērt gotovu. Turēsim pi vuorda!
Piec treju stuņžu literarajom izdareibom, pi vuorda tyka ari grypys „Borowa MC” muzykalais koncerts.
