Latgolys Radejis zinis (3.11.2008.)

Šudiņ Daugavpils Universitatē (DU) suocās i leidz 7.novembram turpynuosīs 3.Zinuotnis festivals. Pīcys dīnys Daugavpilī vaļdeis zynuotne i kotrs- gon lels, gon mozs – iz breidi varās īzajust pietnīka lūmā i atkluot dobys i tehnologeju nūslāpumus. Informejūt sabīdreibu par ituo breiža aktualitatem i skaidrojūt zynuotnis nūzeimi ikdīnys dzeivē, vysaidi zynuotnis atkluojumi, pietiejumi i cytys temys tiks pasnīgtys saprūtami i interaktivi. Jimt daleibu itymā festivalā aicynuoti zynuotnīki, studenti, školuotuoji, školāni, kai ari cyti interesenti.

Šudiņ plkst.16.00 Davgavpils Universitatis (DU) Muokslys galerejā 3.Daugavpiļs Zynuotnis festivala gaitā tiks atkluota Ričarda Garbačiauska personalizstuode. Izstuodē apsaveramī gleznīceibys dorbi ir filozofiski, lakoniski i kruosaini. Nu 1982.goda jis ir jiems daleibu vairuokuos grupu izstuodēs, kai ari eksponiejs sovus gleznīceibys dorbus personalizstuodēs Lītuvā, Igaunejā, Latvejā, Pūlejā, Zvīdrejā i Nīderlandē. Izstuode byus apsaverama leidz 2.decembram.

Jākubpiļs rajonā, Vīseitis Bārnu i jaunīšu centrā šudiņ, 3. novembrī nūtiks patriotiskuos pīdzeivuojumu i izaicynuojuma spielis “Jaunī Reigys sorgi” ūtruos kuortys saceņseibys. Tymuos komandys nu vysa rajona sagaida vysadi izaicynuojumi, puorbaudiejumi, jaunu prasmju apgive i zynuošonu puorbaude. Nuokamuos tyvuokuos spielis paradzātys 5. novembrī, tuos nūtiks Aizkrauklis rajonā.

Nu šudinis, 3.novembra, Rēzeknē, Latgolys kulturviesturis muzeja centralajā ākā, byus apsaverams pietiejums-prezentaceja “Rēzekne i Rēzeknis apkuortne Latvejis 90 godūs”. Tuo tapšonā izmontuoti muzeja kruojuma materiali – postkartis, potonegativi i potograpejis, kas raksturoj Rēzeknis i Rēzeknis apkuortnis dzeivi nu 1918.goda. Prezentacejā skotami attāli ar anotacejom ļaus kotram apmekleituojam īzaviert Rēzeknis i Rēzeknis apkuortnis viesturē 90 godu garumā.

Šudiņ nu plkst.9 ļeidz 12.00 Gaigalovys pogosta padūmis telpuos nūtiks Donoru dīna. Sakarā ar tū, ka teik īvīsta jauna inpormacejis sistema i izbraukuma specialistu dorbs ir datorizeits, registracejis process sūluos byut nadaudz ilguoks nakai parostai. Donoru dīnys organizatori lyudz donorus byut saprūtūšim i pacīteigim. 4.novembrī Donoru dīna tiks organizeita Bolvūs, Socialuo servisa telpuos, 5.novembrī – Rankā, ambulancis telpuos, 6.novembrī – Varakļuonūs, poliklinikys telpuos, bet 7.novembrī Rēzeknis dūmē. Donoru dīna vysur ilgs nu plkst.9 leidz 12.00

Latgolys opgoboltīsa šudiņ plkst.10 skateis kriminallītu par cigarešu kontrobandu i vaļsts omotpersonys pīnuokumu napiļdeišonu. Ituo nūzīguma izdareišonā apsyudzeitys sešys personys. Četrom personom – R. Barkānam, I. Troškam, A. Aleksejevam i Krīvejis Federacejis pylsūņam N. Lepiņam – apsyudzeiba calta par kontrabandu, tai kai tū izdariejuse organizeita grupa, divom – R. Naglim i A. Voikam – par vaļsts omotpersonys pīnuokumu napiļdeišonu. Da šam lītā jau nūpratynuoti vairuoki līcinīki, i tū dareit planuots ari nuokamajuos tīsys siedēs.