Vacreigu okupej latgalīši
Sasatikšonys vīta koč ari piec nūsaukuma pavysam nalatgaliska beja kafeineica „Leningrad”, kurys interjers styprai atguodynoj Padūmu laiku dzeivūkli i drusku ari taidu lauku sātu, kur vēļ vacuokys sekcejis ar tūs laiku gruomotom, pi sīnys vacais stuņdinīks, styurī vacuo televizora kaste…
Pasuokumu ar sovu kluotbyušonu pagūdynova daudzeji Latgolys Studentu centra bīdri, pīsavīnova ari Ilona Salceviča, Juoņs Dimants, Aivars Mackevičs, Ivars Logins, Juoņs Strods… vysus i napuorskaiteit!
Muzicieja grupa „Restauratori”, kurys vokalists ir Verners Martinovs; ailis skaiteja literats Raibais Suņs; kluotyn ar garmani beja ari Aņss Ataols Bierzeņš, kas daudzejim varātum byut lobuok zynoms, kai „Maskačkys Spielmaņu” vadeituojs. Tai nu saguoja, ka leluokū vokora dali Aņss spieļova i skaneigai dzīdova, a puorejī podturēja ar sovu bolsu cik varieja.
Iz vītys beja vareiba nūpierkt ari jaunuokūs latgalīšu muzykys aļbumus – kas tū vēļ nav paspiejs, var izmontuot latgalīšu interneta veikala MadeInLatgola.LV paleidzeibu. Nu ostoņu stunžu vokorā da pusē diveju naktī latgalīšu muzyka i ļaužu volūdys naapryma Vacreigys Kalieju īlys 45. kuormā.
Pasauocīņa dalinīki i organizatori aplīcynova vajadzeibu itaidys kūpeigys pasiediešonys, parunuošonys, sadzīduošonys reikuot ari iz prīšku – dūmojams, ka tuos varās nūtikt vysmoz reizi mienesī pa caturtdiņom. Seikuoka informaceja tiks publicāta Latgalīšu Kulturys Gazetā (LaKuGa.LV), ite niu varit atrast i apsavērt ari vairuokus fotoattālus nu pasuokuma, kai ari nalelu video.
