Latgolys Radejis zinis (2.10.2008.)
Šudiņ 2.oktobrī Rēzeknis Augstškolā (Atbreivuošonys alejā 115) nu 15 leidz 17 stuņdem nūtiks “Sarunys par Eiropys nuokūtni pi kopejis”. Kai informej augstškolys sabīdriskūs attīceibu nūdalis specialiste Lolita Kivleniece-Kuzņecova. Pasuokumu vadeis filozofs, Latvejis Universitatis pasnīdziejs, profesors Igors Šuvajevs. Daleibu jims arī bejušais Korupcejis nūvieršonys i apkaruošonys biroja prīkšnīks Aleksejs Loskutovs, Latvejis Juristu bīdreibys viceprezidents Arvīds Dravnieks i filozofe Māra Kiope.3.oktobrī Daugavpilī Finanšu ministreja i Vaļsts ījāmumu dīnests sadarbeibā ar Latvejis Dorba deveiju konfederaceju i piļsātu dūmju puorstuovjim, svynūt Latvejis 90. godadīnu, reikuos Finanšu forumu Latgolā, kura gaitā sveiks lobuokū dorba devieju regionā. Finanšu foruma mierkis ir sekmēt atvārtu i kvalitativu diskuseju starp uzjiemiejim, pošvaļdeibu darbinīkim, ministrejis i Vaļsts ījāmumu dīnesta specialistim par pošlaik svareigom temom.
Šudiņ, Rēzeknis piļsātys dūmis konferenču zalā iz tikšonūs ar dūmis vadeibu, deputatim i a/s „Rēzeknis syltumteikli” aicynuoti visi SIA „Latgales enerģija” darbinīki, kuri varātum turpynuot dorbu syltumapguodis jūmā. Tikšonuos laikā teik runuots par pīduovuojumu puorīt pastuoveigā dorbā a/s „Rēzeknis syltumteikli”, kai arī tiks snīgtys atbildis iz naskaidrim vaicuojumim.
Planavuots, ka dorba vizitē Rēzeknē šudiņ īsarass īkšlītu ministrs Mareks Segliņš, tai informej Rēzeknis piļsātys dūmis sabīdriskūs attīceibu nūdalis vadeituoja Diāna Zirniņa. Ministrs tiksīs ar Rēzeknis piļsātys dūmis prīšksādātuoju Juri Gunti Vjaksi. M.Segliņš īpasazeis arī ar Pošvaļdeibys policejis, Rēzeknis piļsātys i rajona policejis puorvaļdis, Vaļsts guņsdzieseibys i gluobšonys dīnesta, Pylsūneibys i miracejis lītu puorvaļdis Rēzeknis piļsātys i rajona nūdalis, Rūbežsardzis koledžys dorbu.
8.oktobrī Daugavpils Universitatis koncertzalā nūtiks Gīsenes Justusa Lībiga universitātis (Vuoceja) simfoniskuo orkestra koncerts, informej DU sabīdriskūs attīceibu i informacejis dalis vadeituoja Vita Viļevko. Jau vaira kai 25 godus Gīsenes Justusa Lībiga universitātis simfoniskais orkestris veiksmeigai uzastuoj ar koncertim Vuocejā i uorpus tuos rūbežom.
