Nu škārsteikla iz papeira
![](https://lpr.gov.lv/wp-content/uploads/2008/bidri/1133.jpg)
Latgolys regiona atteisteibys agenturys vadeituos i Kulturkapitala fonda finansātuos Latgolys kulturys programys ītvorā 2008. godā tyka atbaļsteits bīdreibys „Latgolys Studentu centrs” izstruoduotais projekts par „Latgalīšu Kulturys gazetys” (škārsteiklā zynoma kai www.lakuga.lv) atteisteibu. Sadarbeibā ar laikrokstu „Latgales Laiks” kotru mienesi jiusim byus īspieja īsapazeit ar ituo Latgolys ļaužu portala jaunumim.
Pādejūs godu laikā Latgolā ir pasalelynovs škārsteikla (interneta) lītuotuoju skaits. Auguse ari latgaliskuo pošapziņa, par kū ir juosoka paļdis muzykantim, kuri dzīd latgaliski, Latgolys Radejis atteisteibai, kur ļauds nazakaunej runuot latgaliskai, škārsteikla projektim (pīvadumam, www.munidraugi.lv, www.borowa.lv, www.bezpvn.lv, www.atzolys.lv, www.dd.atzolys.lv, www.lr.lv, www.latgola.lv i.c.) i dažaidim komentarim/forumim, kur teik raksteits latgaliskai. Paguojušajā godā tyka izmontuota īspieja radeit pyrmū latgalīšu kulturai velteitu portalu www.LaKuGa.LV.
Itaids portals dūd īspiejis:
- ar latgalīšu kulturys jaunumim īsapazeit iz vysa pasauļa (Latgolys regionā, Reigā i trimdys latgalīšim);
- apkūpuot informaceji par latgalīšu kulturu, deļ tam ka zinis ir izkaiseitys pa vysaidim olūtim i naratai ir naprecizys;
- tei ir demokratiska virtuala ustoba, kuramā sovys dūmys var izstuosteit kai kasdīnys skaiteituoji, tai ari latgalīšu kulturys i sabīdriskuos dzeivis dareituoji;
- portalā publicātūs materialus var izmontuot studenti, kai ari školuotuoji i školāni, kuri fakultativi vuica/vuicās latgalīšu rokstu volūdu, literaturu;
- portalā ir publicāti ari naseņ papyldynuotī „Latgalīšu raksteibys nūsacejumi” (lakuga.lv/lg/voluda/raksteiba).
Tik tuoļ par škārsteikla sātys lopu www.lakuga.lv, kuramā kotru dīnu varit atrast kū na viņ jaunu par latgalīšu vaicuojumim, tak raizi mienesī da ituo goda beigu „Latgalīšu Gazeta” kai „Latgales Laika” dalykums iz papeira drukuotā veidā pīduovuos interesantuokuos viests, kai ari informaceji par gaidamajim latgaliskajim pasuocīnim nuokamajā mienesī. Īsacejumus, kritiku, sovus rokstus i cyta veida informaceji aicynojam syuteit iz e-posta adresu: lakuga@latgale.lv