Latgolys Radejis zinis (29.05.2008.)
Nedelis beiguos, 30.i 31.majā, Ciesīs nūtiks 8. Latvejis zānu kuoru saliduojums “Laimys zemi meklejūt”, kurā uzastuos ari jākubpilīši. Pils parka estradē saliduojuma koncertā sovu veikumu ruodeis 55 kuori, taipoš uzastuos grupa “Pruota Vātra”, “Iļģi”. Uzvadumā pīsadaleis ari Jākubpils Bārnu i Jaunatnis centra “Tārpu Teātris”, grupa “TWINS” i Gintas Modes teātri.Naturalizacejis puorvaļdis Rēzeknis regionaluo nūdaļa sadarbeibā ar Guļbenis rajona Strodu pogosta padūmi šudiņ plkst.17.30 Stāķu pamatškolys telpuos reikoj Informacejis dīnu Strodu pogosta īdzeivuotuojim par pylsūneibys īgiušonys vaicuojumim. Informativuos tikšonuos laikā specialisti informies napylsūņus i cytus interesentus par naturalizacejis procesu i cytim Latvejis pylsūneibys īgiušonys veidim, kai ari par naturalizacejis puorbaudejumu saturu latvīšu volūdā. Piec Īdzeivuotuoju registra datim, Strodu pogostā nu 2140 īdzeivuotuojim ir 99 napylsūni i 6 uorvalstnīki.
Šudiņ Daugavpili apmeklies Moskovys Centra opgobola Arbata rajona puorvaldis vadeituoja vītneica Nellija Čerkasova i puorvaldis padūmneica tierga i pakolpuojumu vaicuojumūs Ludmila Koroļova. Daugavpilī gosti tiksīs ar pilsātys dūmis prīšksādātuoju Ritu Strodi, apmekļās pylsātys socialuos īstuodis, īpasazeis ar Daugavpils Socialūs lītu puorvaldis dorbu, pošvaldeibys socialom programom itt. Piecpušdinē gosti jau dūsīs iz Reigu, kur pīsadaleis Moskovys i Latvejis sadarbeibai veļteitā konfereņcē.
31. majā Rēzeknis pylsātys kulturys nomā nūtiks Vyspuorejūs latvīšu Dzīsmu i Deju svātku amatierkuoru Latgolys nūvoda pusfinala skate, kurā pīsadaleis aptuvenai 600 daleibnīki nu Rēzeknis, Ludzys, Bolvu, Jākubpils, Daugavpils, Preiļu, Cāsu i Reigys rajonim, kūpā 21 kuors. Par tū, kuri kuori 8. julī pīsadaleis finala skatē – konkursā „Dzīsmu kari” Reigā, izlems vierteišonys komiseja, kurā byus Dzīsmu i Deju svātku viersdirigenti. Rēzeknis rajonu Latgolys nūvoda pusfinala skatē puorstuoveis Rēzeknis kulturys noma sīvīšu kuors ‘Medicus” dirigentys Inārys Strulis i Andys Lipskys vadeibā, Viļānu kulturys noma sīvīšu kuors „Alta” i A/S „Latvejis finieris” jauktīs kuors „Trejkola”.
