Latgolys Radejis zinis (28.05.2008.)

Samazynuoti īrūbežuojumi dobys līguma “Lubuona mytruojs” projektā. Jamūt vārā īdzeivuotuoju, pošvaļdeibys vadeituoju i Saeimys Agrāruos, vidis i regionāluos politikys komisejis praseibys, Vidis ministreja ir byutiskai mainejuse īprīškejūs īrūbežuojumus gadejumūs, ja aizsorgojamuos tereitorejuos ir īkļautys apdzeivuotys vītys vai ari saimnīcyskajā darbeibā intensivi izmontuotuos vītys.

Reit Višķūs nūtiks “Lobuo prakse LEADER+ veida pasuokuma eistynuošona Latvejā” informativais seminars vītejom reiceibys grupom, kurū organizej Zemkūpeibys ministreja sadarbeibā ar Latvejis Lauku forumu. Seminarā tiks puorrunuota LEADER+ pasuokumu eistynuošona i projektu realizaceja Latgolys reģionā.

Reit Leivuonūs Inženertehnologeju i inovaceju centra telpuos Leivuonu nūvoda dūmis prīšksādātuojs Andris Vaivods apbolvuos labuokūs Leivuonu nūvoda školānus, kas dabuojuš panuokumus vuiceibu prīkšmetu olimpiadēs i konkursūs. Itūgod apbolvuojumu sajims vairuok nakai 100 školāni i vairuok kai 50 školuotuoji nu vysom Leivuonu nūvoda pamatškolom i vydsškolom.

Šudiņ Daugavpils invalidu forumā paradzāts izstruoduot reiceibys planu vidis pīejameibys uzlobuošonai Daugavpilī cylvākim ar invaliditati, jaunajom mameņom ar bārnu ratenim i cylvākim godūs. Iitūnedeļ ar devīzi “Mes visi esam dažaidi, bet myusim ir vīnaidys tīseibys. Mes asam par vīnleidzeigom īspiejom visim!” Daugavpilī nūtyka guojīns, kura dalinīki izvērtē vidis pīejameibu.

Nuokušnedeļ, 8. junī, Preiļu 2. vydsškolys stadionā nūtiks Pavasara sporta spēlis invalidim. Sacenseibys nūtiks vairuokūs sporta veidūs – šautreņu mesšonā, basketbola struopis metīņūs, tuolliekšonā, lūdis gryusšonā, apļa mesšonā i armreslingā.

Šudiņ i reit, plkst.18.30 Daugavpils teatra mozajā zalā nūtiks Alana Eikborna komedejis “Tuos sasūdeituos mīlesteibys deļ” pyrmizruode. Izruodē atspūguļuotuos porostu “mozūs” cylvāku – Barbarys, Nikijas, Hemiša i Gilberta vātrainuos kaisleibys līk smītīs i reizē kavēties ryugtuos puordūmuos.