ES PAR LATGALI
Pi pasuokuma deleibnīku registracejis kotram tyka īdūti materiali par pasuokuma dīnys kuorteibu, īejas bilete iz vokora koncertu, kurā uzastuo latgalīšu grupa „Dabasu Durovys”, kai ari Anastasejis Tretjakovas, Zviergzdinis pogosta apvydvuordu kruojums, kuru palaseit ir pa eistam aizraujūši. Nu tuo var izzynuot, ka „sāžouka” ir dīķis, „jugaze” – lupataina vecene, „bess”- ceriņš, a „jauktive” – draiska meitine utt.
Pasuokuma īvodā tyka nūdemonstrāta video filma par tū, kai projekta darbeibys laikā „Lietussarga” jaunīši brauce gostūs da cytu rajonu jaunīšim, popularizeja sovu kulturu un vuicē sovu dzymtū latgalīšu volūdu.
Gostūs nu Reigys beja atbraukušys programys „Jaunatne darbībā” puorstovis Juta Reķele un Ieva Sila, kas rozstuosteja par ituos programys darbeibys principim un aicynuo jaunīšus nasiedeit molā, bet gon raksteit projektus. Ieva Sila īpazeistynuo ar „Eurodesk”, kas ir Eiropys jaunatnis portals, kurā var atrast atbiļdis iz dažaidim jaunīšus interesejūšim vaicuojumim.
Jaunīši, kuri beja atbraukuši gostūs nu citim rajonim atvede interesantus muojisdorbus par latgaliskom temom. Pasuokuma daleibnīki varie puorbaudeit, cik jī ir eruditi latgalīšu muzykys jūmā atbyldūt uz vaicuojumim un izlūceit kuojis kūpeigā dejā.
Pecpušdinī tyka reikuots forums, kura golvonuo tema beja latgalīšu diskriminaceja. Tyka apsprīsti jautuojumi -Kas ir latgalīts? Voi legendys par latgalīšu izcelsmi, atpaliceibu un „bomžu” zemi ir patīsi? Lai atspākuotu itūs napatīsūs apgolvuojumus tyka mynāti pozitivī pīmāri, kod izgleituoti, boguoti i pazeistami cylvāki nazakaunej nu to, ka cālušīs nu Latgolys. Pat Talsūs kaida školuotuoja beja sacejuse „Ja latgalietis kaut ko izdomā, tad to arī sasniedz”.
Vaicuojumā par latgalīšu diskriminaceji tyka izsaceits vīdūklis par tū, ka cytu reizi godās tai, ka latgalīts pats veicynoj diskriminaceji pret sevi. Bet bolsuojumā vairuokums beja par tū, ka nav tai, ka diskriminaceja byutu vārsta pret vysim latgalīšim, bet gon tikai dažūs gadejumūs. Visi daleibnīki pīkryta, ka pyrmkuort jau pošim latgalīšim ir juopastuov par sevi, juosagloboj sova volūda un kultura, juoreikoj latgaliski pasuokumi, seminari un juoroksta projekti. I tod byus tai kai sauklī, kas izskaneja vīnā nu ituo pasuokuma jaunīšu mojisdorbim „Mes asom vysur, mes asom ite!!!”