Latgolys Radejis zinis (14.05.2008.)
Šudin, 14.majī, plkst.18.30 Rēzeknis pilsātys kulturys nomā nūtiks Rēzeknis Tautys teatra īstudeituos lugys “Ite nivīns napeipeis” pyrmizruode. Tys ir stuosts par kaimiņu attīceibom i “skeletim šapī”; par rūbežom, kurys mes nūspraužam, puorkuopjam, izdzeivojam. Lai arī cik atšķireigi cyts nu cyta byutu lugys varūņi, ir koč kas, kas jūs vīnoj…Šudiņ plkst.16.00 Latgolys Centraluos bibliotekys (LCB) laseitovā tiks atkluota puču i literaturys izstuode “Ak, ituos naporostuos sanpaulejis!”. Izstuodis apmekleituojim byus īspieja apsaviert ap 50 sanpauleju škirnes, sajimt konsultacejis tūs audzeišonā, kai ari īsapazeit ar literaturu par itom pučem. Atkluošonys dīnā paredzāta ari puorsteigumu lotereja, kurā apmekleituojim byus īspieja īgiut sovā eipašumā kaidu nu sanpaulejom jeb Uzambārys vijūleitem, kurys bibliotekai iz izstuodes laiku pīduovoj davgavpilītys – sanpauleju audzātuojis i kolekcionars. Izstuode byus apskotama leidz 17.majam.
Augstuokuos tīsys (AT) Kryminallītu tīsu palata šudiņ apelacejis kuorteibā izskateis 2005.godā uzsprydzynuotuo Bolvu uzjiemieja Alberta Brīža slepkaveibys lītu. Pārn 11.juņī Latgolys opgoboltīsa trejim nu četrim itymā lītā apsyudzeitīm pīsprīde borgys cītumstruopis iz 15, 10 i 8 godim, divus tīsojamūs apcītynuoja jau tīsys zalā. Vīnam apsyudzeitejam kriminalstruope natyka pīmāruota. Krīvejis pylsūņam Konstantinam Sisujevam par uzjiemieja Brīža slepkaveibu seviški pastyprynūšūs apstuokļūs, kai arī par smogu i seviški smogu nūzīgumu izdareišonu pyrmuos instaņcis tīsa pīsprīde 15 godu cītumstruopi ar montys konfiskaceju.
Šudiņ plkst.15.00 Daugavpilī, Šaurā ielā 24, tiks nūdūta ekspluatacejā pošvaldeibys daudzdzeivūkļu dzeivojamuo sāta. Tymā byus 30 divustobu i 40 vīnustobys dzeivūkļu. Tuos nūdūšona ekspluatacejā palelynuos pošvaldeibys dzeivojamū fondu i ļaus byutiskai samozynuot dzeivūkļu ryndu. Vyspuorejā ryndā registreitys 227 saimis. Daugavpils pošvaldeiba mynātuo projekta realizacejā īguļdiejuse vairuok par miļjonu latu (70%), bet vaļsts – 429 000 latus (30%). Ceļtnīceibys dorbus veikuse firma “Gādība”.
Šudiņ Rēzeknis pylsātys dūmis prīšksādātuojs Juris Guntis Vjakse pīsadaleis Latvejis Lelūs pylsātu asociacejis reikuotajā tikšonuos raizē ar īkšlītu ministru Mareku Segliņu, sovukuort itymā sasdinē Vaļsts rūbežsardzis koledža, sadarbeibā ar AS „Parex banka” i Rēzeknis pylsātys dūmis Sporta puorvaldi, organizej Rēzeknē starptautiskū skriejīni pylsātys īluos. Registrātīs var www.vrk.rs.gov.lv kai ari iz vītys leidz plkst.10:30. Interesentim byus īspieja īsapazeit ar informaceju par koledžu, apskateit VRK reiceibā asūšūs tehniskūs leidzekļus.
Eipašū uzdavumu ministra elektroniskuos puorvaldis lītuos sekretariats, turpynojūt izgleitojūšūs seminaru cyklu školānim par drūšu interneta lītuošonu, šudiņ Ludzys pylsātys gimnazejā i reit, 15. majā, Ludzys rajona Zylupis vydsškolā reikoj debašu stuņdis ”Internets – draugs voi īnaidnīks?”. Seminarūs sekretariāta specialisti vadeis debašu stuņdi, kurā školāni tiks aicynuoti izsaceit sovu vīdūkli i diskuteit gon par interneta prīškrūceibom, gon ari puorrunuot īspiejamū apdraudiejumu, taipoš jī tiks informāti, kur vaicuot, ja internetā konstateits nalegals voi navālams saturs.
