Latgolys Radejis zinis (18.04.2008.)

Šudiņ Kruoslovys kulturys nomā nūteik pylsātys statusa daškieršonys 85.godadīnai velteits pasuokums “Kruoslova tev izvieleituo vīta, kur Daugova i Juoņupeite tak”. Pasuokumā Kruoslovys gimnazejis audziekni snīgs īskotu pylsātys viesturē i uzastuos ar prīkšnasumim. Piec tam paradzāta Kruoslovys vacuokuo īdzeivuotuoja i XX godsymta 20.-30.godu pylsātys meru gimenis lūcekļu sveikšona. Dažaidi itai dīnai veļteiti pasuokumi Kruoslovā turpynuosīs da goda beigom. Itūgod aprit arī 890 godi, kūpš Kruoslova pyrmū raizi mineita hronikuos.

Šudiņ Rēzeknis rajona padūmē Lobkluojeibys ministrejis eksperti tiksīs ar pensionarim, kab skaidruotu pošlaik aktualū penseju politikā i atbildeitu iz īdzeivuotuoju vaicuojumim. “Penseju jūmā teik veikta virkņa uzlobuojumu, i sabīdreibai ļūti byutisks ir izskaidrojūšīs dorbs, deļ tuo jau tyvuokajā laikā planoju tikšonūs i diskusejis ar pensionarim vysūs Latvejis regionūs,” skaidroj lobkluojeibys ministre Iveta Purne (ZZS).

Šudiņ vizitē Jākubpilī īzaras Latvejis Basketbola savīneibys (LBS) puorstuovji, LBS generalsekretars Edgars Jaunups, Anitra Eiklone, Edijs Eglītis, Viktors Zujevs. SIA “Jākubpils Sporta centrs” telpuos LBS puorstuovi tiksīs ar pylsātys dūmis prīšksādātuoju Leonīdu Salceviču, rajona sporta ākolys direktoru Edgaru Lambu, mēra padūmnīku Juri Asaru i SIA “Jākubpils Sporta centrs” vaļdis prīšksādātuoju Juri Bobrovu. Vizitis laikā LBS puorstuovi īplanuojuši apmekliet ari Jākubpils sporta nomu i Jākubpils 3.vydsskūlys jaunū sporta zalu.

Šudiņ i reit, Rēzeknis augstskūlā (RA), Informacejis tehnologeju centrā nūtiks 7.Latvejis matematiķu konference. Tuos atkluošona planuota plkst.13.30. Plenarsiedi vadeis Latvejis Matematikys bīdreibys prīkšsādātuojs Andrejs Reinfelds. 7.Latvejis matematiķu konfereņcis daleibnīku vydā ir gon Latvejis matematikys bīdreibys bīdri, gon aktivī Latvejis matematiķi.

Par vaļsts volūdys nalītuošonu profesionalūs i omota pīnuokumu veikšonai napīcīšamajā apjūmā ar naudys sūdu 100 latu apmārā administrativi struopeits kaids Rēzeknis pošvaldeibys uzjāmuma vaļdis lūceklis. Sūdeitais pylsātys pošvaldeibys uzjāmuma vadeituojs da ituo goda 1.apreļam nabeja nūkuortuojs vaļsts volūdys prasmis eksamenu napīcīšamajā leimenī i pakuopē, kai jam tū beja nūsacejs juo dorba deviejs, deļ tuo VVC ir lyudzs pylsātys dūmī izlemt vaicuojumu par mineitū darbinīku.