Latgolys Radejis zinis (28.03.2008.)
Šudiņ Zemissardzis 46.kuojnīku bataljonā Ventspilī i 34.artilerejis bataljona šautuvē Davgavpilī vīnlaiceigi suoksīs Zemissardzis lūžu šaušonys sacenseibu pyrmīs pūsms, kurā pīsadaleis komandys nu 22 Zemissardzis vīneibom. Mynātuos sacenseibys nūzarysynuos četrūs pūsmūs, nuokamīs nu tīm paradzāts 26.aprelī Dūbelē i Preiļūs. Sacenseibu golvonī uzdavumi ir sagatavuot profesionaluo dīnesta karaveirus vaļsts aizsardzeibai, veicynuot šaušonys sporta atteisteibu Zemessardzē, kai arī nūskaidruot lobuokuos vīneibys i karaveirus šaušonys sportā.Iz Latvejis i Krīvejis rūbežys Terehovys rūbežkontrolis punktā šūreit izbraukšonu nu vaļsts gaida 400 kravys automašynys, bet Grebņevā – 30. Tys ir nadaudz mozuok nakai vakar, kod Terehovā ryndā gaideja 400 kravys automašynys, bet Grebņevā – 70.
Tierdznīceibys kompleksa byuvnīceibys Ludzā īceris publiskuos apsprīšonys laikā sajimti 33 pilsātys īdzeivuotuoju vīdūkli, nu tīm pozitīvi – 27, tai līcynoj informaceja Ludzys dūmis sātyslopā. Byuvnīceibys īrūsynuotuojs ir SIA “Baltic Finanz-Invest-2”, kas Latgolys īlā 15, Ludzā planoj izbiuveit tierdznīceibys centru, kurā byus pīeejami puortykys produkti, pučis, byuvmateriali, miebelis. Planuots, ka centrā īzavītuos ari apteka i kafejneica.
Šudiņ Preiļu nūvoda dūmes siedē planuots apstyprynuot SIA “Preiļu saimnīks” 2007.goda puorskotu. Preiļu nūvoda dūmes siedis dorba kuorteibā īkļauti arī vaicuojumi par finansialu atbolstu Preiļu slimineicys generatora pīsliegšonys dorbu veikšonai, par atbolstu jaunīšu bīdreibai “Preiļu alternativuos kulturys atbolsta centrs”, par projekta “Preiļu Vaļsts ģimnazejis ādynuošonys bloka rekonstrukceja” realizaceju, par zalta i dimanta kuozu jubilaru gūdynuošonu u.c. vaicuojumi.
Šudiņ Ludzys rajona padūmes siedē planuots apstyprynuot pošvaldeibys pasažiru regularūs puorvoduojumu dotaceju komisejis nūlykumu, tai līcynoj informaceja Ludzys rajona padūmis sātyslopā. Ludzys rajona padūmis siedis dorba kuorteibā īkļauti ari vaicuojumi par 2008.goda pošvaldeibu ceļu i īlu finanseišonai paradzātūs mierķdotaceju planu, par atteikumu puordūt pošvaldeibai pīderūšuos ākys dalis Ludzā, par Ludzys rajona padūmis Atzineibys roksta daškieršonu, materialuo pabolsta daškieršonu guņsgrāka gadejumā i.c. vaicuojumi.
